Цæгат Ирыстоны районты цæрджытæн спортмæ фæндаг фенцондæр. Амæй фæстæмæ сын фадат уыдзæн тренировкæтæм Дзæуджыхъæумæ лæвар цæуын. Растдæр зæгъгæйæ та, та сæ ласдзысты. Парти «Иугонд Уæрæсе»-йы хъæппæрисæй сын нæ республикæйы промышленность æмæ транспорты министрад радих кодта билеттæ лæвар цæуынæн. Бæлвырддæр нæ уацхæсджыты æрмæджы.
Туаты Хъазыбег футболæй 9 азы архайы. Уыдонæй 5 азы тренировкæтæм цæуы Дигорайæ. Дыууæрздæм цæугæйæ, фæндаггаг схардз кæны 200 сомы. Мæймæ йæ хæрдзтæ цас рауайынц. уый зын банымайæн нæу. Фæлæ сæ ныр ферох кæндзæн. Районтæй Дзæуджыхъæумæ тренировкæтæм чи цæуы, уыцы футболон скъолаты хъомылгæнинæгтæн радтой автобустыл цæуынæн лæвар билеттæ.
Ацы хабарыл æрмæст Хъазыбег нæ цин кæны, фæлæ ма Дзæуджыхъæуы футболон скъолаты 45 хъомылгæнинаджы. «Нырма уал нын фадат ис æрмæст æрыгон футболисттæн баххуыс кæнын. Фæлæ фидæны фæнд кæнæм спорты иннæ хуызтæй чи архайы, уыцы сывæллæттæм дæр фæкæсын» – зæгъынц акци аразджытæ, парти «Иугонд Уæрæсе»-йы уæнгтæ. Партийы регионалон хайады секретарь Ортабайты Тимуры ныхæстæм гæсгæ, сæйрагдæр у, спортмæ чи тырны, уыцы сывæллæттæн баххуыс кæнын.
Æхсæнадон транспортыл лæвар цæуыныæн билеттæ футболисттæн радих кодта нæ республикæйы промышленность æмæ транспорты министрад. Цæмæй бæлццæттæласæн компаниты дæр ма стыхсын кæной, уый тыххæй министрады ссардтой фæрæзтæ. Хайдарбек Бутовы ныхæстæм гæсгæ, дарддæр дæр архайдзысты спортсментæн баххуыс кæнынæн æхца ссарыныл.
Ног хъæппæрисы фарс рахæцыдысты районты сæргълæуджытæ дæр. Республикæйы хъæутæй æмæ горæттæй Дзæуджыхъæумæ ссæуын æрмæст хи транспортыл кæмæн ис, уыдонæн та алы мæй дæр фæндаггаджы æхцатæ фæстæмæ дæтдзысты. Лæвар билеттæй та пайда кæнæн уыдзæн, нырма уал, афæдзы кæронмæ.
