Зонадон, кондады æмæ инновацион центр “Баспик” уæрæхдæр кæны. Раздæр компаниимæ иу бæстыхайы уыд Цæгат Кавказы хæххон металлургон институты хойраджы продуктты кафедрæ. Фæлæ рæстæг цыд æмæ куыстуатæн кондадон фæзуæттæ нал фаг кодта. Ныр студенттæ зонындзинæдтæ исдзысты ног цалцæггонд агъуыстыты, “Баспик”-ы корпусы та фæзындзæн инновацион центр. Ног лабораторийы ахуыр кæндзысты микронанотехнологитæ, атомтæй райдайгæйæ. Цавæр ног гæнæнтæ ма фæзындзæн, уый базыдтой ме ‘мкусджытæ.
Корпус мæнæ ахæм уавæры куы уыди, уӕдӕй мæй йедтæмæ нæ рацыд. Ныр металлургон факультеты цалдæр уæладзыджы ӕнӕхъӕнӕй рацарæзтой Цæгат Кавказы хæххон металлургон институты хойраджы продуктты кафедрæйæн. Баивтой коммуникацитæ æмæ бацæттæ кодтой аудитори химион лабораторон иртæстытæн.
Уый компани “Баспик”-ы руаджы. Инновацион центр йæхæдæг æрбынат кæндзæн 5-æм уæладзыджы æмæ бацахсдзæн æгас бæстыхай. Ногдзинæдты фæрцы куыстуаты авналæнтæ фæуæрæхдæр уыдзысты. Ам архайынц зондджын æмæ курдиатджын фæсивæдæн аккаг уавæртæ саразыныл. Цалдæр азы размæ Цæгат Кавказы хæххон металлургон институты фæзынд профилон кафедрæ “Оптоэлектроникæ ӕмӕ фотоэлектронон дзауматӕ”. Уыцы иу рæстæг ис ахуыр кæнæн дæр, æмæ премитæ исæн дæр.
Йæ бирæазон историйы дæргъы “Баспик” цалдæр хатты фæуæрæхдæр кодтой. Куыстуат пайда кæны 150-йæ фылдæр ног оптикон-электронон дзаумайæ, ис ын ног гæнæнтæ, фестырдæр йæ базарады географи. Ныртæккæ ног лабораторийы бындурыл ахуыр кæндзысты микронанотехнологитæ, атомон æмвæзадæй райдайгæйæ.
Паддзахадон хæстæ æххæст кæнын у куыстуат “Баспик”-ы фыццаградон нысан. Уый республикæйæн ахсджиаг у, фæбæрæг кодта директор Хъулаты Сослан. Куысты бынæттæ, кадртæ æмæ ног зонындзинæдтæ. Уыцы иу ран — наукæ, ахуырад, нырыккон технологитæ æмæ экономикæйы ахсджиаг къабаз. Инновацитæ æмæ технологитæм стыр æргом здахы регионы разамонæг Сергей Меняйло.
