Терроризмы ныхмæ къамисы æмбырд уыди абон Дзæуджыхъæуы. Разамынд ын лæвæрдта республикæйы сæргълæууæг Битарты Вячеслав.
Архайдтой дзы хицауады сæрдар Тускъаты Таймураз, парламенты разамонæг Алексей Мачнев, республикæйы сæйраг инспектор Челæхсаты Владимир æмæ муниципалон скондты разамонджытæ. Ныхасы сæр – Интернеты цæстфæлдахæн миты ныхмæ цы архайд цæуы, уый. Национ ахастдзинæдты фарстаты фæдыл министрады хъæппæрисæй арзæт æрцыд сæрмагонд кусджыты къорд. Уыдон сæ хъус дардзысты интернеты хызæгтæм. Архайдзысты экстремистон кæнæ террористон æрмæг иуварс кæныныл. Бафиппайын хъæуы уый, æмæ экстремизмы ныхмæ цы роликтæ ис, уыдон æхсæнадæн стыр ахъаз сты. Уымæй уæлдай министрады официалон сайты фæзындысты ног гæнæнтæ. Алы адæймагæн дæр йæ бон у фехъусын кæнын экстремистон цауты тыххæй. Ацы проекты сæйраг мидис у – терроризмимæ баст æвирхъау цаутимæ тох кæнын. Ныры онг нæ республикæйы алы районы дæр ис æхсæнадон æмгустады центртæ. Сæ сæйраг нысан у скъолаты, техникумты, училищæты æмæ уæлдæр ахуырадон бынæтты профилактикон куыст кæнын.
Нæ республикæйы сæргълæууæг Битарты Вячеслав куыд бафиппайдта, афтæмæй центрты кусджытæ хъуамæ се ‘мгæрттимæ кæной профилактикон куыст. Уыимæ ма дзы ацы аз Цæгат Ирыстонæй архайдтой 410 минæвары. Уыдон дæр стыр куыст бакодтой ацы хъуыддаджы. Национ ахастдзинæдты фарстаты æмæ фæсивæды хъуыддæгты фæдыл министрадтæ æмгуыст кæнынц барадхъахъхъæнджытимæ. Снысан кодтой сæрмагонд мадзæлтты пълан.
