Уазджытыл хъазахъхъ сæмбæлдысты, куыд æмбæлы, афтæ — цæхх-къæбæрæй. Фæлæ каравайыл нæ баззад фысымдзинад,æппæты дæр фынджы уæлхъус æрбадын кодтой. Хæринæгтæ — традицион: хъæбынтæ, дзидзаимæ гуылтæ, цæхджын къабуска. Иууылдæр сæ сфыхтой пецы æмæ йæ сæ дарæг дæр уый тыххæй хонынц. Терскæйы станицæйы сæдæгай азты дæргъы цард куыд цыди, уый тыххæй ныййарджытæн дзурынц чысыл экскурсоводтæ.
Гом арвы бын музей сывæллæтты рæвдауæндон “Теремок”-ы сарæзтой дыууæ азы размæ. Æцæг хъазахъхъаг кæрт. Ахæм хæдзæрттæ станицæйы фыццаг цæрджытæ амадтой 1763-æм азы. Æрмæст уæды сæрибаруарзаг лæг йæ цæрæнуат хуыдта хата. Æртæ æнусмæ ‘ввахс рацыд, фæлæ ам æгъдæуттæ рох не сты, фидар сæ цы кæнынц ахæм проектты руаджы, æндæр. Хистæр къорды сабитæ экскурситæ арæх саразынц, куыд сæ ныййарджытæн æмæ кæстæртæн, афтæ кадджын уазджытæн дæр.
Хъазахъхъаг сылгоймаджы хорз æфсин дзæгъæлы нæ хонынц. Хæринаг кæнын кæддæриддæр зыдтой æмæ уарзтой. Алы хатæйы дæр сын уыд хицæн къуым. Уым æвæрд уыдысты сæ дзаумæттæ стыр чырынты. Этнографион музейы сывæллæттимæ иумæ саразынц традицион бæрæгбæттæ дæр: Покров день, Масленица, Святки.
Рагон хæдзары мигæнæнтæ æмбырд котой æгас станицæйæ. Æмæ зын нæ уыди. Абон дæр алы хæдзары æвæрдæй лæууынц нанайы хуыйæн машинæ, кæнæ пирæн, зæронд иту, уазныв.
Хатæйы сæр бамбæрзтой хъамылæй, хъомылгæнджытæ йæ сæхæдæг æртыдтой. Алцыдæр, раздæр куыд кодтой, афтæ. Фыдæлты культурæмæ хæстæг.
1763-æм азы Екатеринæ II бардзырдмæ гæсгæ Терчы рахизфарс зæххытæ радтой хъазахъхъæн. Афтæ фæзынц хутор Надтереченый. Æнусы фæстæ йæ, Александр II указы фæстæ, схуыдтой станица Терская. Æмæ йын йæ истори цæрджытæ хъахъхъæнынц æмæ фæлтæрæй фæлтæрмæ дæттынц.
