Токаты Асæхы рухс ном æрымысыдысты Дзæуджыхъæуы

Токаты Асæхы рухс ном æрымысыдысты Дзæуджыхъæуы. Фыссӕг, драматург, тӕлмацгӕнӕг, актер, режиссер, Фыдыбӕстӕйы Стыр хӕсты архайæджы райгуырдыл ацы аз æххæст кæны 115 азы.  Йӕ бирӕвӕрсыг сфӕлдыстад ирон литерӕтурӕйы ӕмӕ драматургийы цы зынгæ бынат ахсы, ууыл æрдзырдтой сфæлдыстадон интеллигенцийы минæвæрттæ. Йæ фæстæ цы бирæ уацмыстæ ныууагъта, уыдон алы кары чиныгкæсæгæн дæр уарзон сты. Йæ ном ын кæддæриддæр ссарынц æхсызгонæй. Фыссæгæн та, цалынмæ адæм йæ уацмыстæ кæсынц, уæдмæ мæлæт нæй. Ирон профессионалон театралон аивады артдзæст чи ссыгъта, уыцы курдиатджын фæсивæды ‘хсæн уыд Токайы-фырт дæр. Фыдыбæстæйы Стыр хæсты уыд бастдзинады взводы командир. Тохы быдырæй куы сыздæхт, уæд Ирон театры дарддæр кусын райдыдта. 1946 азы йын радтой республикæйы сгуыхт артисты ном. Асæх — курдиатджын драматург, фыста æмдзæвгæтæ æмæ радзырдтæ дæр. Йæ пьесæтæ алы азты æвæрд æрцыдысты Ирон театры сценæйыл. Йæ “Усгуртæ” та йын ратæлмац кодтой бирæ æвзæгтæм, йæ пьесæ йын сæвæрдтой суанг Польшæйы, Чехословакийы, Болгарийы æмæ æндæр фæсарæйнаг бæстæты стыр сценæтыл дæр.
Мысæн изæр бацæттæ кодтой Хетæгкаты Къостайы номыл литературон музей æмæ республикæйы фысджыты цæдис Дзæуджыхъæуы центрон чиныгдоны фыццæгæм хайады æххуысæй. Æрбахуыдтой йæм сфæлдыстадон къорд “Талатæ”-йы сабиты, чиныгкæсджыты, Токаты мыггаджы минæвæртты æмæ Асæхы чызджы фырт Хъантемыраты Оледжы.