Хетӕгкаты Къостайы райгуырды 162 азы фӕдыл Цӕгат Ирыстоны Ахуырады кусджыты фæлтæрдзинад уӕлдӕргӕнӕн институты уыд ӕппӕтадӕмон наукон-практикон конференци. Ныхас дзы цыд нырыккон национ ахуырады бастдзинадыл Къостаимæ. Конференци у æрвылазон. Ахуыргæндтæ дзы кæрæдзиимæ сæ фæлтæрддзинадыл ныхас кӕнынц.
Архайджыты нымæц у сæдæмæ ‘ввахс. Се ‘хсæн Цæгат ӕмӕ Хуссар Ирыстоны ирон ӕвзаг ӕмӕ литературӕйы ахуыргӕнджытӕ, наукон кусджытæ, студенттæ. Конференци арӕзт æрцыд Цæгат Ирыстоны ахуырад ӕмӕ наукӕйы министрады ӕмӕ Ахуырады кусджыты фæлтæрддзинад уӕлдӕргӕнӕн институты хъӕппӕрисӕй. Йæ куыст у секцитæм гæсгæ, сты æртæ.
Конференцийы дзырдтой Хетæгкаты Къостайы сфæлдыстад æмæ цардвæндаджы тыххæй. Уымæй уæлдай, йæ цард канд сфӕлдыстадон куыстыл кæй не ‘нцад, фӕлӕ кæй уыдис ӕхсӕнадон архайӕг дӕр. Филологон наукæты кандидат Хъуыссæты Зæлинæ та раныхас кодта Къостайы драматургон сфæлдыстадыл.
