Рагон чингуытӕ, ивгъуыдӕй фыстӕджытӕ, ацы тӕрхӕджытӕ хъахъхъӕнынц алыхуызон заманты истори ӕмӕ культурӕ. Цӕрджытӕн уарзон Алагиры чиныгдон цалцӕг кӕныны фӕстӕ йӕ хуыз скалдта. Райдзаст кӕсӕндонӕй уӕлдай ма ам фӕзындысты клубты иугӕндтӕ. Сног чингуыты фонд. Алы рауагъдыл дæр ауыды Хъайсынты Лаурӕ. Чиныгдоны кусы 15 азӕй фылдӕр. Уымæй уæлдай ма фыссы, Райгуырӕн бӕстӕ чи хъахъхъӕдта, уыцы хъӕбатыртӕ ӕмӕ ӕмзӕххонтыл чингуытӕ.
Чиныгдонмæ ӕрбацӕуджытӕн Лаурӕ йе ‘мкусджытимӕ аразы алыхуызон мадзӕлттӕ. Историон лекцитӕй поэтикон изӕрты онг. Ам уазджытӕн сӕ бон æрмæст кӕсын нӕ, фӕлӕ ма проекттыл ныхас кӕнын ӕмӕ цыбыр фембӕлдтытӕ кæнын дӕр у. Уӕлдай ӕргом здахынц рӕзгӕ фӕлтӕрмӕ. Скъоладзаутӕн расидынц патриотон ахуыртӕ, гом уроктӕ ӕмӕ дæсныйадæвдисæг ахуыртæ.
Егъау ивддзинæдтæ цæуынц Дзӕуджыхъӕуы дӕр. Кырджалийы уынджы чиныгдон иунӕг у хӕстӕгдӕр микрорайонты. Дыууӕ мӕйы размӕ ам райдыдта бындурон цалцӕг. Архивон ӕмӕ кӕсӕн залӕй уӕлдай ма фӕзындзысты стъолтӕ трансформертӕ, компьютертӕ ӕмӕ ноутбуктӕ. Сног ӕмӕ фӕфылдæр уыдзӕн чингуыты фонд. Сывӕллӕттӕн сифтонг кӕндзысты сфӕлдыстадон уат гитарӕ, пианино ӕмӕ ныв кæнынæн гæрзтимæ. Уыимæ ма дзы сараздзысты аив тыгъдад гом арвы бын.
Сног кæндзысты Къостайы проспекты чиныгдон дӕр. Ног культурон бынат уыдзæн æгас бинонтӕн дӕр. Ӕппӕты чысыл уазджытӕн сифтонг кӕндзысты сӕрмагонд интерактивон пъол. Уымӕй уӕлдай ма саразынц, “кружок-малышок” кӕй хонынц, уый, уым сывӕллӕтты рӕвдауӕндоны кары сабийы иу-дыууӕ сахаты ныууадзӕн уыдзӕн. Ӕнахъомтӕн сараздзысты зонӕ стъолыл хъӕзтытимӕ, компьютертимӕ ӕмӕ ноутбуктимӕ. Рудзынджы тӕрхӕджытыл уыдзӕн бары стъолтӕ, бахизӕны та сӕвӕрдзысты маркизтӕ.
Ног фӕлтӕры чиныгдæттæ бирӕтӕн суыдзысты уарзон бынæттæ, алкӕй бон дӕр уыдзӕн йӕ зӕрдӕйæн æхсызгон архайд ссарын. Уыимæ ма ӕмбӕлттыл ӕсхуызон интерестимӕ фембӕлыны фадат. Уӕ зӕрдыл уын ӕрлӕууын кӕндзыстæм, бындурон цалцӕггæнæн куыстытæ ӕххӕстгонд цӕуынц нацпроект “Бинонтӕ”-йы фӕлгӕты ӕмӕ фӕуыдзысты ацы аз сентябры кӕронмӕ.
