Цӕгат Ирыстоны филармонийы уыд концерт “Советон кинойы хуыздӕр зарджытӕ”. Сценæмæ рацыд Людмила Зыкинайы номыл паддзахадон академион адӕмон ансамбль “Россия”. Оркестр цагъта аивадон разамонӕг Дмитрий Дмитриенкойы ӕмӕ дирижер Сергей Корняковы разамындӕй. Дзӕуджыхъӕу эстафетӕ райста Налцыккӕй. Уый у бӕстӕйы культурӕйы Министрады егъау фестиваль “Достояние нации”-йы иу хай. Программӕйы номырты ‘хсæн — Александра Пахмутовайы “ИнтермЕццо” “Три тополя на Плющихе”-йæ, Лапины романс комеди “Верные друзья”-йæ, музыкӕ киноныв “Кавказская пленница”-йæ. Ансамблы артисттӕ сæхæдæг сарæзтой аранжировкæтæ сӕрмагондӕй ацы концертæн, цæмæй зындгонд зарджытæ адӕмон инструменттимæ иумæ аивæй зæлой.
Сценӕмӕ рацыдысты солисттӕ Иван Дятлов, Дарья Сикальская ӕмӕ Борис Дьяков. Калининграды драмон театры актер Олег Яковенко вокалон равдыстытӕ баиу кодта амонӕджы ролимӕ. Йæ зарджытæ — Андрей Мироновы репертуарӕй. Музыкалон номырты рæстæг экраныл æвдыстой советон кинонывтæй ист кадртæ.
