Цæгат Ирыстон бафыста æмгуыстады бадзырд Адæмон хæдзарад æмæ паддзахадон службæйы уæрæсейаг академиимæ. Сæ къухтæ йыл æрæвæрдтой Сергей Меняйло æмæ ахуырадон кусæндоны проректор Александр Ефимов.
Документы фæрцы фылдæр гæнæнтæ уыдзæн паддзахадон æмæ муниципалон службæйæн специалисттæ цæттæ кæныны ахуырадон æмæ наукон проекттæн. Ныр регионы æххæст кæндзысты уæлæмхасæн ахуырадон программæтæ разамынддæттæг оргæнты кусджытæн.
Кæндзысты сын наукон-методикон æххуыс. Курдиатджын фæсивæды профессионалон райрæзтæн дæр — фылдæр гæнæнтæ. Сергей Меняйло ма фембæлд Зонындзинæдты центр “Машук”-ы директор Антон Се́риковимæ дæр. Сæргълæууæг ын раарфæ кодта регионимæ иумæйаг проекттæ аразынæн кæй æххуыс кæны, стæй медиафорум “PRO Кавказ”-мæ экспертæй кæй æрбацыд, уый тыххæй. Радта йын республикæйы кадджын грамотæ.
