Хъармгæнæн рæстæгмæ цæттæ кæнынц Цæгат Ирыстоны. Æппæт куыстытæ цæуынц “Энергетикæ æмæ цæрæнуатон-коммуналон хæдзарады куыстуæтты æнæцудгæ экономикон рæзты” фæлварæн программæ æххæст кæнгæйæ. Йæ фæлгæты байгом кодтой донæввонг æмæ хъармдæттыны иумæйаг оператортæ Ныртæккæ специалисттæ бæрæг кæнынц агдæттæ æмæ цæрæн хæдзæрттæ. Цы аиппытæ сбæрæг вæццынц, уыдон æвæстиатæй иуварсгонд æрцæуынц. Дзуапдæттæг бæрнады минæвæртты ныхæстæм гæсгæ, архайд нысангонд пъланæй нæ иппæрд кæны, зымæджы хæдзæртты уыдзæн хъарм.
Цæмæй ацы агдон хъармгæнæн рæстæгмæ бацæттæ кæной, уый тыххæй бахъуыд 2 къуырийы бæрц. Ныртæккæ профилактикон куыстытæ фесты. Агдоны мигæнæнтæ сног кодтой, ныр се скусынæн хъæуы æрмæст æлхъивæныл бахæцын. Специалисты, къуылымпыдзинад ма руадзыны тыххæй, хъæуы æрмæст цæст дарын. Зæгъæм, электрон тыхы куыст рæстæгмæ куы баурома, уæд ифтонггæрзтæ хъæуы ахуыссын æмæ ногæй скусын кæнын. Агдоны хъомыс æххæсы цалдæр микрорайоныл — 7-æй 15-æмы онг, ис сæ 170-ы бæрц хæдзары. Йæ техникон уавæр кæддæриддæр хорз у.
Горæты 105 агдонæй хъармгæнæн рæстæгмæ цæттæ сты 74. Техникон уавæрæй уæлдай, хыгъдмæ ист цæуынц объекты æмæ йæ алфамбылайы аивдзинад. Цæттæ кæнынц хъармгæнæн хæтæлтæ дæр, сæ уавæр сын 195 километрæй 170-ы сбæрæг кодтой.
Къостайы проспектыл бирæфатерон хæдзары дæр зымæгмæ цæттæ сты. Æппæт фатерты дæр хъарм уыдзæн. Ам æрæджы зæронд хæтæлтæ ногтæй раивтой. Æрластой сæ Стъараполæй.
Сæрдыгон-зымæгон афонмæ цæттæгæнæн куыстытæ Цæгат Ирыстоны цæуынц æмæ къуылымпытæй. Ивгъуыд мæй республикæйы хицауад сфидар кодта мадзæлтты хыгъд. Агдæттæ æмæ хъармгæнæн хæтæлтæй уæлдай, ахсджиаг у цæрæнуæтты хицæутты æмхæларæдтæ, разамынддæттæг куыстуæттæ æмæ хæдзæртты управленитæ бацæттæ кæнын.
1-æм ноябрмæ хъармдæттæг куыстуæттæ хъуамæ цæттæдзинады паспорттæ райсой. Уый фæстæ дзуапдæттæг бæрнад сæрмагонд гæххæтт ратдзæн муниципалон скондтæн дæр, æмгъуыд — 15 ноябрмæ. Домæнтæм гæсгæ, хæдзæрттæ æмæ социалон ахсджиаг объекттæ хъарм кæнын райдайдзысты, суткæйы рæстæмбис температурæ 5 боны дæргъы 8 градусæй къаддæр куы уа, уæд.
