Хетæгкаты Къостайы 160 азы юбилеймæ кадджын мадзæлттæ нæ республикæйы дарддæр æххæстгонд цæуынц. Ныр райдайдзысты сæ сæйрагдæртæ. Абон Дзæуджыхъæуы 13-æм скъолайы ахуырдзаутæн, зындгонд фыссæджы кадæн, сарæзтой фембæлд Къостайы номыл преми кæмæн саккаг кодтой, уыцы курдиатджын адæмæн. Ахуыргæнæндон дæр хæссы Хетæгкаты Къостайы ном. Сывæллæттæ бакастысты сæ уарзондæр æмдзæвгæтæ, уыимæ ма сын разынд фадат сæ фарстатæ раттын уазджытæм дæр.
Цы уын нысан кæны Хетæгкаты Къоста? Ахæм цымыдисаг фарст радтой 13-æм скъолайы ахуырдзаутæ сæ бæрæгбоны мадзалмæ чи æрбамблд, уыдонæн. Кæй зæгъын æй хъæуы, хуымæтæг уазджытæ не`сты. Къостайы кадджын премитæй кæй схорзæхджын кодтой, уыдон. Се`хсæн Кокайты Таймураз, Цомартаты Изæтбег æмæ Цгойты Хазби. Зындгонд публицист куыд радзырдта, афтæмæй Къостайы хуызæн фыссæг, канд Цæгат Ирыстоны нæ, фæлæ ма æгас дунейы дæр стæм разындзæн. Дæнцæгæн æрхаста – Ирон фæндыр.
Фембæлд саразыны хъæппæрис разынд нæ республикæйы педагогон институты разамындмæ. Ахæм программæ бацæттæ кæнынц алы аз дæр. Хетæгкаты Къостайы къуыримæ скъоладзаутæ бацæттæ кæнынц сæ уарзондæр æмдзæвгæтæ æмæ сæ аив бакæсынц.
«Ныстуан», «Марходарæг», «Дыууæ фæндыры» … Къостайы ацы рæнхъытæ бирæтæн сты зонгæ. Къостайы фæдон, ахæм ном хæссын скъоладзаутæ иумæйагæй бæллынц.
Къостайы къуыри абон райдыдта Дзæуджыхъæуы базарадон-экономикон техникумы дæр. Студенттæ, ахуыргæнджытæ æмæ техникумы уазджытæ сарæзтой кадджын мадзал. Ацы бæрæгбон ам уæлдай ахсджиаг у, уымæн æмæ Хетæгкаты Къостайы цард баст уыд ацы ахуыргæнæндонимæ. Раздæр уыд прогимназ. 1869-1871 азы онг Къоста йæхæдæг ахуыр кодта ам. Ныр, къуырийы дæргъы техникумы цæудзысты сæрмагонд мадзæлттæ: тымбыл стъолтæ, литературон изæртæ æмæ равдыстытæ.
Алыхуызон мадзæлттæй схъæзджыг уыдзæн Хетæгкаты Къостайы 160 азы юбилей. Райсом республикæйы районты ацæудзæн литературон флешмоб «Къостайы сахат». Сæйрагдæр мадзæлттæ та ацæудзысты 15 октябры, Нары хъæуы. Арфæйы ныхæстимæ бæрæгбоны архайджытæм фæситдзæн нæ республикæйы сæргълæууæг Битарты Вячеслав, уыимæ ма Хуссар Ирыстоны президент Бибылты Анатолий. Бæрæгбоны мадзæлтты архайджытæ азардзысты Къостайы фыст æмдзæвгæ «Балцы зараг». Хъуыстгонд аиадон къордтæ та бацæттæ кæндзысты сæрмагонд концерттæ.
Пелиты Сабинæ
