Дзæуджыхъæуы бирæуæладзыгон хæдзæртты цæрджыты арæх бахъæуы сæ фатермæ фистæгæй схизын. Йæхи фаг тыхтæ кæмæ нæй, уыдонмæ арæх вæййы хызынтæ дæр. Афтæмæй сын сæ цæрæнбынатмæ бафтын хъаймæтæй хъауджыдæр свæййы. Бирæ азты хæдзæртты лифтытæ кусынц къуылымпытимæ. Чи сæ кусы, уыдоны та ныссæдзынæй тас вæййы. Ныр хъуыддаг фӕхуыздӕр.
Кусджытæ къоппæй исынц ног лифты хæйттæ. Уыцы-иу рæстæг лифтытæ æвæрынц Доваторы номыл проспекты бирæуæладзыгон хæдзæртты цалдæр подъезды. Цæрджытæ куыд зæгъынц, афтæмæй раздæры кабинæтæ заууат уавæрмæ æрцыдысты. Æдасдзинады домæнтæн дзуапп нал лæвæрдтой.
Дзæуджыхъæуы æмæ Мæздæджы ацы азы кæронмæ фæзындзæн 100 ног лифты. Хъуыддаг къухы бафтыд республикæйы сæргълæууæджы хæстæ рæстæгмæ æххæстгæнæг Сергей Меняйло æмæ «Карачаровский механический завод»-ы хицау Дзиуаты Алыксандримæ кæй баныхас кодта, уый руаджы. 8 кабинæйы ма баивдзысты медицинон уагдæтты дæр. Ныридæгæн специалисттæ кусын райдыдтой.
Абоны бонмæ æвæрд æрцыд 49 лифты. Хæстæгдæр рæстæг ма сыл бафтдзæн ноджы 51. Æппæт лифтæ сæвæрдзысты афæдзы кæронмæ.
