Æрдзон зынгсирвæзтытæ æрцæуынæй ацы рæстæг уæлдай тæссаг вæййы тæвды аххосæй. Ныр дæр, Гидрометеорологи æмæ алфамблайы дунемæ цæстдарды Цæгат Ирыстойнаг центры хъусынгæнинагмæ гæсгæ, республикæйы быдырты, æмæ Мæздæджы районы термометртæ бавдисдзысты 38 градусы Цельсимæ гæсгæ. Ахæм уавæр ахæссдзæн 22-æм августмæ. Специалистты ныхæстæм гæсгæ, æппæты тынгдæр-иу температурæ схиздзæн боны 13 сахатæй изæры 18 сахатмæ. Уымæ гæсгæ, специалисттæ сидынц адæммæ, цæмæй къаддæр рæстæг æрвитой уынджы, фыргуыст ма кæной æмæ фылдæр дон нуазой.
Уымæй уæлдай ма æнæнхъæлæджы уавæрты министрады Цæгат Ирыстойнаг управлени республикæйы цæрджыты зæрдыл лæууын кæны, тæвд рæстæг доны объектты кæй сарæх вæййынц фыдбылызтæ æмæ хи хъахъхъæнын хъæуы. Фыдбылызæй хи бахизынæн найæн æмбæлы æрмæстдæр сæрмагонд бынæтты. Зæгъæм, хæххон дæтты хи найæн нæй. Тæссаг дзы у æрмæст уазал дон кæй кæлы, уымæй нæ, фæлæ ма цæрдæг æмæ абухгæ дæттæ адæймаджы ахæссын дæр кæй зонынц, уымæй. Сывæллæтты дæр доны был улæфгæйæ æнæ цæстдардæй уадзæн нæй. Тæвд æмæ хус рæстæг ма хъæдты вæййы зынгсирвæзтытæ, æмæ уымæй дæр тæссаг у. Æнæмæнг æххæст кæнын хъæуы æдасдзинады домæнтæ. Уæ зæрдыл уын лæууын кæнæм, æнæнхъæлæджы уавæры куы бахауат æмæ уæ зынгхуыссынгæнджытæ æмæ ирвæзынгæнджыты æххуыс куы бахъæуа, уæд иу стационарон телефонтæй бадзурут – «01», мобилонтæй та – «101» æмæ «112».
