Цæгат Ирыстоны дарддæр æххæст кæнынц “Æнæпилотон авиасистемæты” национ проект. Практикон кълæстæ Цыколайы скъолайы байгом кодтой сентябры. Фæсивæды ахуыр кæнынц æнæпилотон аппараттимæ кусыны сæйраг æууæлтыл. Фæлварынц машинæтæ æмбырд кæнын, базонынц техникæйы ног хуызты тыххæй. Иуæи-иутæ сæ дронтæ скъæрын дæр базыдтой. Ахуыртæм цæуынц астæуккаг æмæ хистæр кълæстæ. Цыколайы скъола ис федералон программæ цы 18 ахуырадон уагдоны æххæст кæнынц, уыдоны ‘хсæн.
Алыхуызон цæлхдурты сæрты атæхын, нысан сæххæст кæнын æмæ дрон фæстæмæ æрбадын кæнын. Ацы гæнæнтæ ис практикон къласы, сарæзтой дзы гыццыл тæхæн зонæ. Тымбыл æмæ цыппæрдигъон цæлхдуртæй иутæ уæлдæр сты, иннæтæ дæлдæр. Æдасдзинады тыххæй фæзуат æхгæд у хызæй. Скъоладзаутæ ацы ахуыртæ уарзынц, ног зонындзинæдтæ сæ зæрдæмæ цæуынц.
Ахуыртæ вæййынц къуыри æртæ хатты. Цæуынц сæм 60 скъоладзауы 8-æй 10-æм къласы онг. Уроктæм тынг фенхъæлмæ кæсынц, уымæн æмæ дрон скъæрын алкæй дæр фæнды базонын. Фыццаг уал сахуыр вæййынц сæрмагонд программæйæйыл æмæ гарзмæ пульт баиу кæныныл.
“Æнæпилотон авиасистемæйы” кълас Цыколайы 3-æм скъолайы байгом ацы аз сентябры. Сифтонг æй кодтой 3Д принтертæ, ноутбуктæ, рухсгæнæнтæ, лупæтæ, æндадзæн æрмæг æмæ дронтæй. Сты цалдæр хуызы. Сæ иутæ — ахуыргæнæн, иннæтæ — спортивон.
Æнæпилотон аппаратты кълæстæ республикæйы æдæппæтæй ис 18. Сæ байгом кæнын къухы бафтыд сæрмагонд федералон проекты фæрцы.
