Ихын бырæн фæзтæ, рæтæн фæндæгтæ, фысымуæттæ, хиирхæфсæн центртæ. Ацы æмæ æндæр объекттæ фæзындзысты тематикон комплекс «Алания парк»-ы. Ныртæккæ йæ арæзтад тæмæны бацыд. Эксплуатацимæ йæ дӕтдзысты къæпхæнгай. Зæгъæм, рæтæн фæндаг байгом кæнынвæнд кæнынц ацы аз.
Европæйы æппæты бæрзонддæр фæлгæсæн цалх æрбынат кодта «Алания парк»-ы. 20 кабинæйы кондиционертæ æмæ хъармгæнæн системæимæ. Йæ диаметр у 42 метры. Гæнæн ис, æмæ Дунейы уа иунæг, бæстыхайы астæу арæзт чи æрцыд, ахæм фæлгæсæн цалх. Рæтæн фæндаджы уæллаг станцæйы фæз суыдзæн парчы аивдæртæй иу. Ам уыдзысты хæрæндæттæ, дуканитæ æмæ хиирхæфсæн æндæр объекттæ. Цалх цы бæстыхаймæ хаудзæн, уый арæзтадæн бардæттæг гæххæттытæ срæвдз уыдзысты хæстæгдæр 10 боны. Гæмæх хохы хиирхæфсæн центр суыдзæн Уæрæсейы егъаудæртæй иу. «Алани парчы» уыдзæн къахдзоныгътыл бырæн тæлмытæ, рæтæн фæндаг, егъау хиирхæфсæн парк, хæххон велосипедтæн маршруттæ, фысымуæттæ æмæ хæрæндæттæ.
Инвестициты гуырахст — 8 миллиард сомы. Объекты куыстытæ æнæрлæугæйæ цæуынц цалдæр бынаты. Инженерон хызæгтæ бауагътой. Ныртæккæ æвæрынц кæнгæ митӕн ифтонггæрзтæ. Уый тыххæй кусдзысты электрон тых дæттæг 18 гарзы. Трассæйы дæргъ 1мин 700 метры. Алы хъуыддагмæ дæр цæуы бæстон æркаст.
Куыстытæ æххæст кæнынц цалдæр къæпхæнмæ гæсгæ. Проект куыд рæвдз кæна, афтæ гом кæндзысты объекттæ дæр. Зæгъæм рæтæн фæндаг сцæттæ уыдзæн ацы аз.
Уазиты Зæлинæ
