Цæгат Ирыстоны дарддæр цæуы вакцинаци. Прививкæ скæнын у алкæй бон дæр. Вакцинаци ацæуæн уыд абон Цæгат Ирыстоны мецдицинон колледжы æмæ базардон-ирхæфсæн центр «Алания Молл»-ы дæр.
Прививкæ скæныны размæ — æнæмæнгæй терапевты æркаст. Сбарынц буары тæвд æмæ туджы æлхъывдад. Дзебойты Станиславы ног низы ныхмæ вакцинаци ацæуын рагæй фæндыд. Кæй скодта, ууыл фæсмон нæ кæны.
Цæгат Ирыстоны медицинон колледжы бындурыл прививкæгæнæн пункт байгом мартъийы. Коронавирусы низ фыццæгты куы апарахат, уæд Дзæуджыхъæуы 1-аг поликлиникæйы разамонæг æмæ колледжы директор рахастой уынаффæ ахуыргæнæндоны бындурыл вакцинацийы пункт байгом кæнын.
Абон колледжы прививкæйы фыццаг хай скодтой 32 адæймагæн, дыккаг компонент та скодта иу. Æнахуыр фæстиуджытæ йæхиуыл ничи банкъардта. Вакцинаци ацæуыны фадат ма ис базарадон центр «Алания Молл»-ы. Фыццæгты ’хсæн дзы уыд Бесолты Виктория.
Ахæм мобилон къордтæ кусынц æппынæдзух. Абалц кæнынц алыхуызон организацитæм.
Коронавирусæй рынчынты нымæц Цæгат Ирыстоны бонæй-бонмæ фылдæр кæны. Пандемийæйы 3-æм уылæн йæ тыхы бацыд. Хи бахъахъхъæнынæн — прививкæ у йæ иунæг хос. У барвæндон хъуыддаг. Специалисттæ ма иу-хатт сидынц республикæйы цæрджытæм, санитарон-эпидемиологон домæнтæ æххæст кæнын кæй хъæуы, уый.
Пелиты Сабинæ
