Цæгат Ирыстоны хъæуты 17 скъолайы байгом кодтой нырыккон ахуырадон центртæ «Точки роста»

27.09.2019 21:18 190

Сифтонг сæ кодтой бæрзонд технологон авналæнтæй: компьютертæ, 3D-принтертæ, квадрокоптертæ, робототехникæ æмæ æндæртæй.


Раздæр уын куыд хъусын кодтам, афтæмæй Цæгат Ирыстоны хъæуты 17 скъолайы байгом кодтой нырыккон ахуырадон центртæ «Точки роста», зæгъгæ. Сифтонг сæ кодтой бæрзонд технологон авналæнтæй: компьютертæ, 3D-принтертæ, квадрокоптертæ, робототехникæ æмæ æндæртæй. Скъоладзаутæн ма фæзынд шахмæттæй хъазыны фадат æмæ царды æдасдзинады бындурон зонындзинæдтæ ахуыр кæнын. Ахæм хъуыддаг къухы бафтыд федералон проект «Современная школа»-йы фæлгæты. Уый тыххæй федералон бюджетæй рахай кодтой 26 милуан сомы. Абон нæ уацхæссæг Къутæрты Аидæ абалц кодта уыцы 17 скъолатæй иумæ, Хъæдгæроны ахуыргæнæндонмæ. Цы æрмæг бацæттæ кодта, уымæ ма бакæсæм.


Хъæдгæроны скъолайы кусджытæ рагæй æнхъæлмæ кастысты ацы бонмæ. Ныр скъоладзаутæн ис алы уавæртæ дæр, цæмæй ног ахуырадон программæйы домæнтæн дзуапп дæттой, æмæ сæ фæлтæрддзинад бæрзонд кæна. Абон Федералон программæйы фæрцы Хъæдгæроны байгом кодтой дыууæ къласы. Уыдон ифтонггонд сты, ног технологон домæнтæн дзуапп чи дæтты, ахæм техникæйæ.

Программæ «Точка роста» кусы националон проекты фæлгæты. Ныры онг ацы проект апарахат æнæхъæн Уæрæсейыл. Æрыдоны районы уал нырма равзæрстой Хъæдгæроны скъола. Андрей Швецов куыд бафиппайдта, афтæмæй ацы проекты фæрцы сабитæн сæ бон уыдзæн, алывæрсыг ахуырадон къабæзтæ кæм ис, ахæм программæмæ гæсгæ архайын.

Æрыдоны районы ахуырадон разамынды хæдивæг Андрей Швецов: «Ахуыргæнджытæ ныртæккæ дæр ма уæлдæр кæнынц сæ дæсныйад. Æнæмæнгæй, уый пайда у. Мæн та уырны, ног домæнтæн дзуапп чи дæтты, уыцы техникæ сывæллæттæн сæ ахуыры кæй бахъæудзæн, уый».

Хъæдгæроны скъолайы цы дыууæ къласы байгом, уым ныртæккæ ис ног компьютертæ, принтертæ, фотоаппараттæ, тагъд æххуысы ифтонггæрзтæ æмæ ма бирæ æндæр хъæугæ дзаумæттæ. Уыдон иуылдæр æххус уыдзысты сывæллæттæн урокты рæстæг практикон хæстыл бакусын.

Скъолайы разамындæн уæлдай æхсызгон у, ахæм аппаратурæ сын кæй рахай кодтой, уый. Директоры ныхæстæм гæсгæ, ацы кълæстæ арæзт æрцыдысты нæ республикæйы министрады хъæппæрисæй. Цоколаты Заремæйы куыд зæгъы, афтæмæй ацы ахсджиаг хъуыддаджы сæйрагдæр у ахуыргæнджыты ног программæмæ гæсгæ бацæттæ кæнын. Уыдон сæ фæлтæрддзинад фæуæлдæр кодтой работотехникæйæ æмæ шахмæттæй.

Абон ацы мадзалмæ æрбацыдысты Æрыдоны районы министрады минæвæрттæ дæр. Уæдæ хъæуы разамынд дæр иуварс нæ баззад. Се ’ппæты дæр уырны, сывæллæтты райрæзтæн пайда кæй уыдзæн ацы проект, уый.

If you have found a spelling error, please, notify us by selecting that text and pressing Ctrl+Enter.