Цæгат Ирыстоны паддзахадон университеты ныр дæс азы дæргъы цæрджытæн юридикон æххуыс кæнынц лæвар. Проекты фæлгæты баххуыс кодтой уæззау уавæры чи бахауд, ахæм сæдæгай адæмæн. Æрæджы та ахуыргæнæндон, Уæрæсейы промышленность æмæ амалхъомады цæдис бафыстой æмгуыстады фæдыл бадзырд. Ныр æххуыс исдзысты бизнесментæ дæр.
Завод «Ирстоун» нырма æрæджы райдыдта кусын. Йæ архайд æнтыстджын кæй уыдзæн, уый абон дæр бæрæг у. Ам, нырыккон мигæнæнтæй пайда кæнгæйæ, аразынц дурæй дзауматæ. Ныртæккæ куыстуатæн йæхи юрист нæма ис. Фæлæ уый тыххæй зындзинæдтимæ не ‘мбæлынц. Лæвар консультаци райсæн ис Цæгат Ирыстоны паддзахадон университеты. Æрмæст хъуамæ уай Амалхъомад æмæ промышленносты уæрæсейаг цæдисы уæнг.
Цæрджытæн æмæ амалхъомадæн æххуысæй уæлдай, ацы хъуыддаг æххуыс у студенттæн дæр. Афтæмæй райсынц фæлтæрддзинад. Цалынмæ архайын райдайынц, уæдмæ та æнæмæнг ацæуынц сæрмагонд ахуыртæ.
Ахуыргæнæндоны ректор Огъуаты Алан куыд фæбæрæг кодта, афтæмæй проектæн ис егъау ахуырадон нысаниуæг. Уæдæ амалхъомтæ дæр ахæм гæнæнтæй разы сты.
Цæгат Ирыстоны паддзахадон университеты юридикон клиникæ кусы 10 азæй фылдæр. Барадон æххуыс та дзы, сæ ахуыргæнджытимæ иумæ, кæнынц хистæр курсыты хуыздæр студенттæ. Сæ фæрцы лæвар юридикон æххуыс чи райсы, уыдоны нымæц азæй азмæ рæзы
