Цæгат Ирыстоны республикон газет «Северная Осетия»-ыл æххæст кæны 105 азы. Йæ тираж – 10 минмæ`ввахс. Рацæуы æрвылбон. Удуæлдайæ йыл архайынц 50 адæймагмæ ввахс. Дзыллон информацион фæрæзты æхсæн «Северная Осетия», зæгъæн ис, æмæ ахсы фыццаг бынат. Уарзынц æй æмæ йæм алы бон фенхъæлмæ кæсынц алы кары адæм. Ис ын сæрмагонд сайт, кæсынц æй социалон хызæгты дæр.
Кусджытæн арфæ ракодта нæ республикæйы сæргълæууæг Сергей Меняйло. Газеты къордæн зæрдæбын ныхæстæ ракодта, цы вазыгджын хъуыддагыл хæст сты, уый фæдыл та сын стыр бузныг загъта. Йæ ныхæстæм гæсгæ, цы бæрнон хæс сæвæрдтой сæхицæн – раст информаци парахат кæнын, – уый ахсджиаг у. Кæй зæгъын æй хъæуы, редакцийы уымæ уæлдай хъус дарынц.
