Сæрмагонд техникæ, хиконд ахорæнтæ æмæ аивгæнæн æрмæджытæ. Цæгат Ирыстоны афæдз кусы иунæг студи, Дзуары нывтæ кæм фыссынц. Æмæ кæд аивады ацы хуызы сусæгдзинæдтæ базонын æнцон нæу, уæддæр студийы ахуыргæнинæгтæн ныридæгæн чысыл нæ бантыст.
Иконæйыл куыст се ‘нцонтӕй нӕу. Хуызнывæн фыццаг бацæттæ кæнынц йæ кæрæттæ. Саив æй кæнынц сыгъзæрины рыгæй. Алы хаймæ дæр хъæуы арæхстгай æвналын, цæмæй зæрингæххæтт (паталь) ма аскъуына. Афтæ тынг æй фæхъахъхъæнынц æмæ сæ йемæ архайгæйæ улæфын дæр ферох вæййы.
Ам иу уæлдай дзаума дæр нæй. Алы фæзилæн, алы хаххӕн дæр ис йæхи нысаниуæг. Дзуары ныв ныффыссыны размæ бæстонæй базонынц иконæйы истори. Æппæт сусæгдзинæдтыл ахуыр кæнынц сæрмагонд студийы. Ныртæккæ дзы сæхи фæлварынц æхсæз адæймаджы. Кæцыдæртæ сæ ахуыр кæнынц сæрмагонд уæлдæр ахуырадон уагдæтты. Фæлæ се ‘хсæн ис, нывкæнынадыл чи нæ ахуыр кодта, ахæм курдиæттæ дæр. Се ‘ппæты дæр æнгом кæны иу хъуыддаг — аргъуаны аивадмæ уарзондзинад. Куыд зæгъынц, афтæмæй ам æнкъарынц монон тых.
Ам ахуырадон чингуытæ не ссардзынæ Ахуырдзаутæ пайда кæнынц хуызæгтæ, кърандæстæ æмæ хъæдын фæйнæджытæй. Уымæй уæлдай ма ахорæнтæ. Нывгæнджытæ сæ сæхæдæг цæттæ кæнынц.
Афтæмæй, ахорæнтæ рауайынц хъæрзхъæд. Иконæтæ та сӕ руаджы хъахъхъæд æрцæуынц æнустæм. Æппæт лыстæгдзинæдтыл дæр ахуыр кæны дæсны нывгæнæг Айларты Олланæ. Схъомыл нывгæнджыты бинонты ‘хсӕн. Иконæтæ фыссынмæ йе ‘ргом здахын райдыдта сабибонты. Йæ ныффыссын та фыццаг хатт бафæлвæрдта скъолайы.
Ныртæккæ Олланæйы куыстытæ фенæн ис нæ республикæ, бæстæ, Украинæ, уыимæ Лондоны аргъуанты. Аланийы 1100 азы аргъуыдмæ та ныффыста историон сюжет «аланийы аргъуыд». Уæдæ, Мадымайрæмы Цæгат-Кавказаг та у иунæг иконографи.
Иконæтæ фыссынады студи у иунæг нæ республикæйы. Байгом æй кодтой афæдз размæ, фæлæ ныридæгæн сæ къухы бафтыд æнтыстытæ. Студийы разамонæг фидарæй зоны, йæ ахуыргæнинæгты куыстытæ фидæны кæй срæсугъд кæндзысты нæ бæстæйы аргъуантæ.
Дзерасса Калоева
