Цæгат Ирыстоны скæндзысты транспортон змæлды сæрмагонд фæтк. Республикæйы сæргълæууæг Сергей Меняйлойы уынаффæмæ гæсгæ йыл кусын райдыдтой фарон. Æххæст ӕй кæнынц ацы аз дæр.
Транспортон инфраструктурæйы рæзтыл бакусынмæ хицауад æрбахуыдта «Строй Инвест Проект» корпорацийы специалистты. Наукон-иртасæн куысты æртыккаг къæпхæн ныридæгæн кæронмæ æрхæццæ. Санкт-Петербургы транспортон системæты институтимæ æмгуыст кæнгæйæ, адæмы удæнцойæн аразынц иумæйаг транспортон схемæ. Æхсæнадон транспорты пайдагæнджытæ ӕмӕ онлайн хуызы горæты цæрджытæн сарæзтой æрфарст. Иртæстыты фæрцы хуыздæр базыдтой адæмы курдиæттæ æмæ фиппаинæгтæ. Уыдоныл æнцайгæйæ фæзындзæн проектон сценарий.
Транспортон пъланӕвӕрд кæй хонынц, уымæн уыдзæн цыбыр, рæстæмбис æмæ бирæмгъуыдон сценаритæ, суанг 2040 азмæ. Проектыл чи кусы, уыдон сæ хъус дардзысты дзуапдæттæг министрады амынддзинæдтæм дæр. Санкт-Петербургы транспортон системæты институт æмæ Мæскуыйы «Строй Инвест Проект» корпорацийы специалистты ног схемæйы руаджы фæндаггон змæлд Дзæуджыхъæуы æмæ æввахс хъæуты фæхуыздæр уыдзæн. Проекты æртыккаг къæпхæны хатдзæгтæ хъуамæ сфидар кæной афæдзы кæронмæ.
