Хохаг къæйдур — фæлладуадзæн бынæтты уæлцъарæн йæхицæй фидардæр æмæ аивдæр æрмæг нæй. Йæ сæвæрын та æнцон нæу. Профессионалон дæсныйады чемпионаты архайджытæ дæр хæслæвæрд зындæртæй иуыл нымайынц. Компетенци “Ландшафты дизайн” студентты ахуыр кæны архитектурæ афтæ ‘фтауын æрдзмæ, цæмæй йын йæ рæсугъддзинад ма хала. Чысыл дыргъдон саразыны хъуыддаг райдианæй кæронмæ ныртæккæ фæсивæдæн сæхимæ кæсы, арæзтадæй цъæх фæлысты онг.
Гæззаты Валерийы бæласдон йæ алы лыстæгдзинадæй дæр бæрæг дары иннæты ‘хсæн. Кæд нырма студент у, уæддæр йæ куыстытæ дæсныты архайдмæ дард нæ лæууынц. Проектæн лæвæрд цæуы æрмæст æртæ боны. Æххуыс сын кæнынц бархионтæ, æрмæгæй сæм хорз фæкастысты. “Цыфæнды хъуыддаг дæр куы уарзай, уæд дзы зынæ йницы ис” — æфсæрмыгæнгæйæ зæгъы лæппу.
Ерыстæм фæсивæд сæхи бæстонæй цæттæ кодтой. Æрмадзты иу сын ахуыргæнджытимæ практикон архайд бацайдагъ. Тагъд, фæлæ æнæ рæдыдтытæй хъуамæ зоной дидинæгкалгæ цæхæрадон саразын. Фæзуæттæ сты фондз. Уæлахизыл тох кæнынц Хъæды хæдзарады техникум æмæ Аграрон-технологон колледж. Практикæмæ рахизыны размæ та уал 3Д-проекттæ скодтой.
Регионалон къæпхæны фæзуат ис Алагиры, Хъæды хæдзарады техникумы. Ландшафты дизайнерты æмрæнхъ дзы ерыс кæнынц фидæны хъæдгæсады кусджытæ дæр. Джанайты Астан фыццаг хатт архайы чемпионаты.
Астан у “Лесное и лесопарковое хозяйство” дæсныйады дыккагкурсон. Хъæд хъæуы æнæзакъонæй бæлæстæ цæгъдджытæй хъахъхъæнын. Зынгсирвæзтытæй, низтæй æмæ зианхæссæг уырынгонтæй дæр ын тæссаг у. Тæхæг аппаратты руаджы тæссаг уавæр æвиппайды рабæрæг вæййы.
Професионалон дæсныйады чемпионаты регионалон къæпхæн мартъийы фæуыдзæн. Йæ хуыздæрты ‘хсæн ма дарддæр хуыздæрты равзардзысты. Æрмæст уыдон суыдзысты Ирыстоны минæвæрттæ æппæтуæрæсеон ерысты.
