Цæгат Кавказы кинохроникæйы студийы гæнæнтыл ныхас цыд республикæйы хицауады. Æмбырд амыдта премьер Дзанайты Барис. Куыд загъта, афтæмæй кинохроникæйы студи регионæн у вазыгджын объект.
Республикæйы разамынды фæндон у – саразын æппæт уавæртæ дæр, цæмæй дзы фадат уа нырыккон кинорауагъдадыл кусын.
Фыццаг уал хъæуы бакусын документацийыл, стæй та уæд бакусын студийы рацарæзтыл, фæнысан кодта Дзанайты Барис. Уæвгæ, Цæгат Кавказы кинохроникæйы студи арæзт æрцыд 1946-æм азы. Систой дзы 500-йæ фылдæр документалон, ахуырадон æмæ наукон кинонывы. Студи федералон исбонадæй республикæйæн радтыныл бакусын бахъуыд цалдæр азы. Фарста алыг кæныныл бацархайдта республикæйы сæргълæууæг Сергей Меняйло.
Ацы азы апрелы бæстæйы президент Владимир Путины бардзырдмæ гæсгæ кинохроникæйы студи радтой Цæгат Ирыстоны исбонадмæ.
