Фæлтæрддзинадæй фæхай кæнын æмæ куысты сусæгдзинæдтæ базонын. Цæгат Ирыстоны дарддæр æххæст кæнынц «Управленческие практики», зæгъгæ, проект. Ацы хатт эстафетӕ райста промышленность ӕмӕ инвестициты министрады командӕ. Уазджытӕ базонгӕ сты ведомствæйы куысты сӕйраг фæзилæнтимæ ӕмӕ фидæнмæ нысантимæ.
Дарддӕр — кабинет нӕ, фӕлӕ æцæг кондад. Архайджытӕн сарӕзтой экскурси мебелы куыстуаты: равдыстой ӕххӕст цикл, раргом кодтой профессионалон лыстӕг фӕзилӕнтӕ. Экспертон фембӕлды фӕлгӕты та уазджытӕ ӕрныхас кодтой базарады куысты бындуртыл, уыимæ ма сӕ хъуыдытæ загътой республикӕйы къабазы рӕзты фæдыл.
Проекты сӕйраг нысан — алы министрадты ӕмӕ бынӕттон хиуынаффӕйады оргӕнты ‘хсӕн æмгуыстад фидар кӕнын. Уый фадат ратдзӕн ахсджиаг хӕстӕ ахадгӕдӕр ӕххӕст кӕнынӕн ӕмӕ хорзырдӕм фӕзындзӕн нӕ республикӕйы царды алы къабӕзтыл.
Проект «Управленческие практики» райдыдта 2025 азы республикӕйы сӕргълӕууӕг Сергей Меняйлойы хъӕппӕрисӕй. Йæ æххæст кæнын ис сæргълæууæг æмæ хицауады администрацийы бæрны.
