38 азы дæргъы йæ пациентты дæнцæгыл æвдисы — онкологийыл фæтых уæвæн ис, æрмæст æм хъæддых æмæ æнæсæттонæй фæлæу. Зæнгионты Эдуард низ дзæбæх кæнынæй уæлдай рынчыны бауадзы къухтæ ма ‘руадзыны ныфс. Æмæ дзы цалынмæ сомбон феныны рухс судзы, уæдмæ медицинæйæн дæр алæмæт сфæлдисыны гæнæнтæ ис. Дохтыр куыд зæгъы, афтæмæй йæ тыхджындæр æмцæдисон у æмбылды фæуын кæй нæ фæнды, уыцы пациент. Уымæн æмæ цард кæддæриддæр йæ сæраппонд тох кæныны аргъ у.
“Дохтыримæ ныхас дæр терапийæ уæлдай нæу”, — зæгъынц пациенттæ. Эдуард ахæм дзырдтæ ссары, æмæ адæймаг æнæниз цардмæ фыццаг къахдзæфтæ акæны. Йæ ныййарджытæ кæд ахуыргæнджытæ уыдысты, уæддæр æй сывæллонæй дæр зыдта — суыдзæн дохтыр. Фæндыд æй йæ фыды ‘фсымæр, республикæйы зындгонд хирургы бафæзмын. Афтæмæй бирæ азтæ снывонд кодта сæр æмæ къубалы рæсыдты хайады зын куыстæн. Фæстæдæр сси ацы здæхты æппæтуæрæсеон советы уæнг. Æмæ йæхæдæг хирургийы хайады сæргъы ныллæууыд.
Фидæны уæлдæр категорийы хирург æмæ сгуыхт дохтыры, мединституты рауагъдон уæвгæйæ, специализаци равзарын хъуыди. Интернатурæйы рæстæг бамбæрста, фыдрæсыды аххосæгтæ бæрæг кæнын æмæ йæ дзæбæх кæныны терапийы ног мадзæлттæ агурын кæй фæнды.
цы аз Зæнгионты Эдуард сси преми “Будем жить”-ы лауреат. Хæрзиуæг у уæззау низы ныхмæ тохы лæгдзинад æмæ ныфс æвдисыны нысан. Ассоциаци “Здравствуй!” 8 азы дæргъы æргом кæны онкологийы ныхмæ тохгæнæг дзæбæхгæнæндæттæ æмæ дохтырты нæмттæ.
Уæззау низимæ тохы удуæлдайдзинад æвдисы Тобойты Давид дæр. Хирург бæрæггонд æрцыд “Хистæр карæн хуыздæр онкологты” номинацийы. Дохтыр суа æви нæ, ууыл хъуыды дæр никуы акодта. Сабийæ фæстæмæ медикты ‘хсæн, уæвгæйæ, æндæр цардвæндаг никуы уыдта.
Премийы уæлахиздзауты ‘хсæн сывæллæтты онкологтæ дæр. Сæрмагонд номинацийы рамбылдта сывæллæтты республикон клиникон рынчындоны онкогематологийы хайад дæр.
