Нæ республикæйы сывæллæттæн хæрзаудæн акци «Операци Улыбка»-йы дохтыртæ цы лæггад бакодтой, уый абарæн дæр ницæйымæ ис. 2 азмæ баххуыс кодтой сæдæ сабийæ фылдæрæн. Цæстуарзон дохтырты руаджы ныр сывæллæтты бон у мидбылты худын. Абон дохтыртæн се ппæты номæй загътой «стыр бузныг». Республикæйы хицауад та схорзæхджын кодтой хæрзиуджытæй.
Медицинон æххуысагур чи æрбацыд, уыдонимæ се ппæтимæ дæр ныхас кæны психолог Ольга Михайлова. Уæвгæ, сывæллон уай æви ныййарæг, операцийæ сæ алчидæр тæрсы. Хъæуы сæ æрбасыр кæнын æмæ сын ныфсы ныхæстæ зæгъын.
¤Хæрзаудæн организаци «Операция улыбка»-йы психолог Ольга Михайлова: «Сывæллæттммæ фæхъазæм, нæхиуыл сæ сахуыр кæнæм, дохтыртимæ сæ рагацау базонгæ кæнæм. Уый – цæмæй фæстæдæр, операцийы рæстæг ма фæтæрсой. Цалынмæ фæхъазæм, уæдмæ сын радзурын, операцимæ сæ куыд цæттæ кæндзысты, уый. Ома, лифтыл сæ ласдзысты, улæфæн маскæ сыл кæй скæндзысты æмæ гыццыл кæй афынæй кæндзысты, уый. Куы райхъал уа, уæд та йæ фарсмæ йæ мад кæй уыдзæн. Сæйрагдæр та, кæй сдзæбæх уыдзæн, уый».
Уæрæсейы алы регионтæй республикæмæ ссыдысты 26 дохтыры. Хирургтæ, анестезиологтæ, педиатртæ, логопедтæ æмæ медицинон хотæ. Хæрзаудæн организацийы педиатр Екатерина Останина нын куыд радзырдта, афтæмæй æркастысты бирæ сывæллæттæм. Цалдæр бонмæ стыр куыст бакодтой. Специалисттæй алчидæр æркаст æмæ сбæрæг кодта сабиты æнæниздзинад.
Хæрзаудæн организаци «Операция улыбка»-йы педиатр Екатерина Останина: «100 сывæллонæй фылдæрмæ æркастыстæм. Скодтам 49 операцийы. Се `ппæтæн дæр радтам амынддзинæдтæ. Скодтам конкультацитæ. Мæнæн куыд педиатрæн, афтæ мæ хæс у сывæллæттимæ операциты фæстæ кусын. Мæ цæст сæм дарын æмæ сæм цы фæрстытæ фæзыны, уыдон аиуварс кæнын».
Хирургты ныхæстæм гæсгæ алы операци дæр схонæн ис, æмбал кæмæн нæй, ахæм. Алы сывæллонимæ дæр хибарæй кусын хъæуы. Иу операци иннæйы хуызæн нæ вæййы.
Хæрзаудæн организаци «Операция улыбка»-йы хирург Андрей Останин: «Сывæллæттæ сæхи куыд æнкъарынц. Хуыцауæн Табу – хорз. Операцийы фæстæ куыд хъуамæ уой, афтæ сты. Никæмæ ницы фæстиуджытæ ис. Дохтырты куысты хатдзæгтæй нæхæдæг дæр разы стæм. Сывæллæтты хъæдгæмттæ хорз дзæбæх кæнынц. Куыд мæм кæсы, афтæмæй, уыдзысты сабитæ рæсугъд уыдзысты. Æмæ хъæлдзæгæй, сæхи не `мбæхсгæйæ, худдзысты».
Операцитæй уæлдай ма дохтыртæ сæ цæгат-ирыстойнаг æмкусджытæн сарæзтой дæсныйад æвдисæг ахуыртæ сывæллæтты æмæ æндæр рынчындæтты кусджытæн. Æнæзивæгæй нæм кæй ссыдысты, уый тыххæй сын чысыл раздæр нæ республикæйы разамынд кад кодта Уырыссаг театры бæстыхайы. Радтой сын кады гæххæттытæ. Уæлдай арфæтæ сæмбæлд Хасан Баиевыл – саккаг ын кодтой «Ирыстоны намысæн»-ы майдан.
Ахæм операцитæ кæнынмæ нæ республикæмæ дохтыртæ ссыдысты дыккаг хатт. Сæ руаджы йæ мидбылты чи бахудт, уыцы сабитæ баисты сæдæйæ фылдæр. Фидæны ма сыл хъуамæ бафта.
