Ахæм кабинеты физикæйыл æнувыд чи нæ у, уый дæр æм сразæнгард уыдзæн. Ноутбуктæ, принтертæ, интерактивон фæйнæджытæ æмæ æндæр цымыдисаг кусæнгæрзтæ.
Уæллаг Санибайы скъола цæттæ кæны “Рæзты тæлм” байгом кæнынмæ. Центр уыдзæн бæлвырд-наукон æмæ технологон здæхтимæ. Нырыккон кабинеттæ фæзынынц хъæуты æмæ чысыл горæтты. Кусæнгæрзтæ дзуапп дæттынц æппæты ногдæр домæнтæн. Ныр дæр ма исынц физикæ æмæ хими базонын æмбырдгæндтæ. Уыдоны руаджы ахуырады хæрзхъæддзинад фæбæрзонддæр уыдзæн, -зæгъы директор Къораты Людмилæ.
Химийы кабинеты дæр нырыккон ахуырады хуыздæр æвдисæнтæ бæрæг дарынц. Суанг ма дзы мебель дæр ног у. Ныр урокты фылдæр æргом аздахдзысты практикæмæ. Ахуырдзаутæн райдайдзысты уæлæмхасæн уроктæ кæнын. Иумæйаг паддзахадон фæлварæн ахæм уавæрты æнцондæр раттæн уыдзæн. Скъола кæронбæттæн куыстытæм райста сæрмагонд фæрæзтæ.
Дзæуджыхъæуы 27-æм скъола. 7 аздзыд Марк Чониашвили робот йæхи къухтæй сæмбырд кодта. Лæппу уыдзæн “Кванториум”-ы æппæты кæстæр ахуыргæнинаг.
Ай та у сывæллæтты технопарк. Робот ахуыр у адæймаджы фæд ссарын æмæ йæ цыппарцалхон хæлары æхсын. Марк ын разамынд дæтты телефоны руаджы. Комьтеры æххуысæй аргъ кæны дунейæн. Дзæуджыхъæуы 22-æм скъола ногдзинæдтæй цух не ййафы.
Техникон лабораторимæ 3D-принтертæ æрæджы æрбаластой. Ацы кабинеты скъоладзаутæ ахуыр кæндзысты роботехникæйы сусæгдзинæдтæ. Ныр дæр сывæллæттæ сæхи фæлварынц зын фæзылдты.
“Кванториумы” ис цалдæр æххæст лабораторийы. Химийы, физикæйы æмæ биологийы. Ахуыргæнджыты фидарæй уырны, ныр конкурсты сæ уæлахиздзаутæ фæфылдæр кæй уыдзысты, уый. Ногдзинæдтæм иууылдæр цæттæ сты. Ацыдысты дæсныйад уæлдæр кæнæн ахуыртæ. Скъолайы зондамонджытæ суыдзысты йæ раздæры рауагъдонтæ дæр. Рафаэль Касумян ЦИПУ-йы математикæ æм компьютерон наукæты факультеты цыппæрæм курсы ахуыр кæны.
Сывæллæттæ ахуыртæ цæудзысты æрмæст уæрæсейаг кусæнгæрзтыл. “Кванториумы” цы гæрзтæй архайынц, уыдон иууылдæр бæстæйы уагъд сты. Технопаркы сæ райрæзтыл архайдзысты Дзæуджыхъæуы Цæгат-Ныгуылæн районы сывæллæттæ. Ахуырадон кусæндæттæ сифтонг кодтой нацпроект “Ахуырад”-мæ гæсгæ.
