Раззагдæр технологитимæ базонгæ уæвын, æлыгæй дзаума скæнын æмæ киберспорты дунемæ уазæгуаты ацæуын. Ахуырадон центр «Вершина»-йы знон райдыдта инженерон-техникон интенсив. 50 скъоладзауæй фылдæр æгас республикæйæ къуырийы дæргъы исдзысты алыхуызон зонындзинæдтæ. Афтæмæй бирæтæн фидæны дæсныйад равзарын дæр фенцондæр уыдзæн.
Логикон æгъдауæй хъуыды кæныныл фæцалх уæвын, стæй æрвылбон царды уӕгъд рæстæг пайдаимæ æрвитын райдайын. Цæмæй ацы нысантæ къухы бафтой, уый тыххæй скъоладзаутæн лæвæрд цæуынц сæрмагонд хæслæвæрдтæ. Информацион технологиты тыххæй лекци кæсы Цæгат Кавказы хæххон-металлургон институты ахуыргæнæг. Ам теори дæр, æмæ практикæ дæр ахсджиаг сты. Ног зонындзинæдтæй фæсивæд спайда кæндзысты уæлдæр ахуыргæнæндоны кафедрæйы.
Микропрепарат куыд хъæуы бацæттæ кæнын æмæ нырыккон мигæнæнтимæ куыд кусгæ у? Чырæгты дихкæнынад куыд цæуы, уый микроскопæй федта Суанты Алинæ. Фидæны йæ фæнды полеонтолог суын. Алагиры 5-æм скъолайы ахуырдзауы уарзондæр предметтæ сты биологи æмæ географи, фæлæ йæ фæнды хуыздæр базонын информатикæ дæр дæр.
Ам æрмæст лекцитæ æмæ эксперименттæ нæй. Фæсивæд уыцы иу рæстæг ахуыр кæнынц æлыгимæ кусын дæр. Сæхæдæг саразынц агуывзӕтӕ, къустæ æмæ æндæр дзауматæ. Афтæ, сæ миддуне дæр хъæздыгдæр кæны.
Инженерон-техникон архайд цæуы ахуырадон центр «Вершина»-йы æппæт лабораториты дæр. Ног зонындзинæдтæ дзы дӕттынц Æрыдоны, Æрæфы æмæ Алагиры районты 7,8 æмæ 10 кълæсты ахуырдзаутæн.
Интенсив у 4 къæпхæнæй арæзт. Ахæсдзæн къуырийы кæронмæ. 50 скъоладзауы райсдзысты сæрмагонд сертификаттæ. Сæйрагдæр та, – ног зонындзинæдтæ. Афтӕмӕй æнцондæрæй равзардзысты фидæны дæсныйад.
