Витаминты комплекс, гилауроны туагад æмæ дон. Нæй дзы ахорæнтæ, хæрдæфдæттæг хъацæнтæ. Дерматиты профилактикæйы препараты сæйрагдæр æууæл та уый у, æмæ йæ компоненттæ аллергийæ кæмæ ис, уыдонæн дæр тæссаг не сты. Проекты автор Тамара Чониашвилимæ ацы хъуыды фæзынд дæндæгты дохтыры æххуысгæнæгæй куы куыста, уæд. Æппынæдзух æрмкъухты чи архайы йæ куысты бынаты, уыдонмæ ахæм дерматит арæх фæзыны. Уæд чызг сфæнд кодта конкурсы бацархайын. Баххуыс ын кодта йæ наукон разамонæг. Æмæ рамбылдта грант милуан сомы. Цы препарат сарæзта, уый фыццаг бафæлвæрдтой алыхуызон клиникæты дохтыртæ. Хосы 50 миллилитрæй адæймаг пайда кæндзæн 2 мæйы онг.
Ацы проекты автор та у Цæгат Ирыстоны паддзахадон университеты медицинон факультеты студенткæ – Кадиты Миланæ. Куыд зæгъы, афтæмæй ахсджиаг у дæндæгты æнæниздзинадмæ стыр æргом здахын. Йæ разамонæгимæ бакуыста сæрмагонд къафеттæ саразыныл. Конд сты кальций, фосфор, фтор æмæ дæндæгтæн æндæр пайда буаргъæдтæй. Уыдон æххуыс сты сæ сыгъдæгдзинадæн.
Реуазты Аделинæйы проекты сæйраг хъуыды та у консервацийы ног хуыз. Цæгат Ирыстоны паддзахадон университеты технологон факультеты 1-æм курсы студенткæйы проект ахатдзæн алы къабæзты райрæзтыл. Йæ хъуыдыйы руаджы алы продуктæн дæр фесафын цы доны дзы ис, уый 90%, ома йæ бахус кæнын. Афтæмæй æппæт пайда æууæлтæ баззайынц продукты, уыимæ вæййынц æнцон ласæн æндæр рæттæм. Проекты сæйраг нысан у Сæрмагонд æфсæддон операцийы архайджыты цæгатирыстойнаг хæрзхъæд продукцийæ сæххæст кæнын.
Ацы аз “Студентон стартап”-ы бацархайынмæ курдиæттæ балæвæрдтой 7 мин адæймагæй фылдæр алы бæстæтæй. Уæлахиздзауты ‘хсæн Уæрæсейы, Казахстаны, Кыргыстаны, Колумбийы æмæ Сирийы минæвæрттæ. Ахæм финансон æххуыс студенттæн фадат дæтты ног къахдзæфтæ кæнынæн зонындзинæдты бæрзæндтæм. Уый та пайда у канд нæ регионы райрæзтæн нæ, фæлæ бæстæйы æмæ ма раст дунейæн дæр.
