«Битва за Кавказ» документалон кинонывы премьера ацыд Цæгат Ирыстоны паддзахадон университеты. Киноныв у телеуынынады проект «Тропами Алании»-йы иу хай. Æххæст æй кæнынц «Ирон адæмы национ-культурон райрæзт»-ы паддзахадон программæйы фæлгæты.
Кинонывыл бакуыстой дзыллон куммуникацитæ æмæ мыхуыры комитет кинойы студи «Ярче»-имæ. Йæ сæйраг хъуыды у Фыдыбæстæйы стыр хæсты архайджыты дæнцæгыл ныры фæсивæдæн равдисын, цавæр хъуамæ уа æцæг адæймаг, йæ миддуне куыд хъуамæ арæзт уа, уый. Кинонывы автортимæ аныхас кæныны фадат дæр уыд, чи йæм каст, уыдонæн – Цæгат Ирыстоны паддзахадон университеты физикон-технологон факультеты студенттæн.
