Æрæджы нæм курдиатимæ æрбацыдысты Црауы цæрджытæ. Куыд загътой, афтæмæй сæ хъæуы цы афтек ис, уый кæнынц æхгæнгæ. Ныр сæ хостæм хъæудзæн Алагирмæ цæуын. Бирæтæн та ахæм гæнæнтæ нæй. Цæрынц иунæгæй, кæнæ сты æппынæдзух низджын. Уæдæ хæдтулгæтæ дæр се ‘ппæтмæ нæй. Зæгъгæ, хос æвæстиатæй бахъуыд, уæд куыд? Црауы цæрджытимæ фембæлд нæ уацхæссæг Дзæдзойты Фатимæ.
Црауы цæры 2 мин адæймагæй фылдæр. Се ‘хсæн иунæгæй чи цæры, кæнæ æппынæдзух низджын чи у, ахæмтæ. 25-æм июлæй фæстæмæ сæ хостæм цæуын бахъæудзæн районы центрмæ. Хъæуы цы афтек ис, уый мæйы кæрон хъуамæ сæхгæной. Уый фæдыл цæрджытæ катайы бацыдысты.
Црауы афтек ис 1960-æм азæй фæстæмæ. Уазиты Людмилæ дзы кусы 1974-æм азæй. Цæрджытæ йæ иууылдæр зонынц фæлмæн, зæрдæхæлар адæймагæй. Уæдæ сæм йæхæдæг дæр тынг лæмбынæг у. Суанг ма чи цы низæй хъæрзы æмæ йын хуыздæр цы хос æххуыс кæны, уый дæр зоны.
Уæдæ-иу ныр хос агурæг Алагирмæ хъуамæ араст уæм, зæгъгæ, фæрсынц адæм. Куыд зæгъынц, афтæмæй сæм æхсæнадон транспорт къуылымпытимæ цæуы. Хъæуы афтек та – удæнцой. Амбулаторимæ дæр хæстæг. Дохтыр дын хостæ куы рафысса, уæд сæ æвæстиатæй ам балхæн æмæ дæхи дзæбæх кæнын райдай.
Апрелы Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло рахаста уынаффæ хи афтектæ паддзахадон рынчындæтты бæстыхæйттæй айсын. Фæлæ Уазиты Людмилæйы ныхæстæм гæсгæ, Црауы афтек ис хъæуы администрацийы бæстыхайы. Амбулаторимæ та, афтæ рауад, æмæ æмкъул сты. Афтекы кусæг куыд зæгъы, афтæмæй йæ цæрджытæ дæр арæх афæрсынц уавæрæй.
Æрæджы цæрджытæ афтек ма сыхгæныны курдиатимæ æрбацыдысты Æгъуызарты Муратмæ дæр Алагиры районы цæрджытимæ фембæлды рæстæг. Республикæйы хицауады сæрдары фыццаг хæдивæг сын зæрдæ бавæрдта, хъуыддагмæ лæмбынæг кæй æркæсдзæн.
Ныр та уал Црауы цэрджытæ зæрдæ дарынц, сæ царды уавæртæ кæй нæ февзæрдæр уыдзысты. Æмæ бахъуыджы рæстæг хъæуы, хæдзармæ хæстæг, сæ бон кæй уыдзæн дарддæр дæр хостæ амал кæнын.
