Фарныхъæуыккæгтæн æхсызгон лæвар. Цыбыр рæстæджы фæстæ Федералон программæйы фæрцы хъæуы байгом уыдзæн ног цалцæггонд культурон галуан. Уыцы ахсджиаг хабар не ‘сфæлдыстадон къордæн фехъусын кодта Фарныхъæуы бынæттон администрацийы сæргълæууæг Галуаты Зауырбег.
Цыбыр рæстæджы æмгъуыдмæ Фарныхъæуы йæ дуæрттæ байгом кæндзæн ног культурæйы галуан. Уыцы фадат бынæттон администрацийы къухты бафтыд Федералон программæйы фæрцы. Зæронд культурæйы хæдзар рагæй цалцæггæнинаг уыд, фæлæ бирæ аххосæгты тыххæй сæ къухты не ‘фтыд бæстонæй ацы хъуыддагыл бацархайын. Хъæуы хицау нын куыд бамбарын кодта, афтæмæй ныртæккæ цалцæггæнинаг куыстытæ сæ тæмæны сты.
Афтæмæй Фарныхъæуы культурæйы хæдзары ахсджиаг фарстамæ йæ хъус æрдардта нæ республикæйы хицауад дæр. Ацы азы кæронмæ бирæ хъæуты тагъд рæстæджы фæзындзæн ног бæстыхæйттæ. Уыцы хъæуты ‘хсæн Фарн дæр.
Хъæуы цæрджытæ нын куыд радзырдтой, афтæмæй раздæры культурæйы хæдзар уыд заууат уавæры. Уыдис – иу афтæ дæр, æмæ-иу цар æркалд. Сывæллæтæ зын уавæрты репетици кодтой. Хиирхæфсæн къордтæ дæр сæм никуы уыд. Фæлæ бынæттон цæрджытæ аивад æмæ культурæйыл сæ зæрдæ не ‘сивтой æмæ архайдтой, цæмæй культурæйы хæдзары æнтыстдзинæдты тыххæй сыхаг хъæутæ зоной. Ныр сæ уыцы хъуыддæгты тыххæй тыхсын нал хъæудзæн. Цалцæггонд галуаны цæрджытæн фæуыдзæн æмбæлгæ уавæртæ сæ курдиат бæстондæр райхалын æмæ йæ дарддæр адæмæн лæвар кæнын .
Цæрджыты цинæн кæрон нал уыд, хъæуы ма спортивон фæз фæзындзæн, зæгъгæ, куы фехъуыстой, уæд, – зæгъы Галуаты Заурбег. Фæзæн цы бæстыхай равзæрстой, уыцы бынаты дæр цæуынц цалцæггæнæн куыстытæ.
Бафиппайын ма хъæуы уый дæр, æмæ раздæр ацы бæстыхай уыдис хуымæтæг культурæйы хæдзар, ныридæгæн та хæсдзæн культурæйы галуаны ном.
Къутæрты Аидæ
