Цыколайы 3-æм скъола бындурон цалцæджы фæстæ 1-æм сентябры йæ дуæрттæ байгом кæндзæн. Бæстыхай 40 азæй фылдæр цалцæггонд нæ уыд. Ныр сывæллæттæн, уыдон та сты 300 фылдæр, зонындзинæдтæ сæ бон исын уыдзæн æмбæлгæ уавæрты. Цавæр программæйы æххуысæй цалцæг кæнынц ахыргæнæндон æмæ ныртæккæ йæ цæттæдзинад цас у, уый радзурдзысты нæ уацхæсджытæ.
Ацы скъолайыл 40 азæй фылдæр цæуы. Бындурон цалцæггæнӕн куыстытæ дзы никуы уыд. Ахуыргæнæндоны кусджытæ йæм сæхи хъарутæй зылдысты, фæлæ уый фаг нæ уыд. Ныр ахуыргæнинæгтæн уыдзæн ног уавæртæ, суанг ма сæ партæтæ дæр уыдзысты ног. Скъола æххæст уыдзæн, нырыккон домæнтæн дзуапп чи дæтты, ахæм гæрзтæй: компьютертæ, проектортæ æмæ интерактивон фæйнæгтæ. Ныридæгæн уал ивынц пъолтæ, рудзгуытæ æмæ дуæрттæ. Дарддæр раивдзысты электрикæ æмæ сантехникон гæрзтæ, банывыл кæндзысты хъармгæнæн системæ. Ивд æрцыд бæстыхайы сæр дæр. Арæзтадон цæттæдзинад у 40% бæрц.
Уæлдай æргом здæхт цæуы хæрæндон æмæ актон залы цалцæгмæ. Бацархайдтой ма, сывæллæттæ улӕфӕн рæстæг сæхи куыд ирхæфсдзысты, ууыл дæр. Саив кæндзысты скъолайы алывæрстæ дæр. Ныртæккæ ам кусы 25 адæймаджы æмæ техникæйы цалдæр иуæджы. Цæлцæггæнæн куыстытæм тынг бæрнон цæстæй кæсынц. Ацы социалон объект ахсджиаг у. Уымæ гæсгæ дзы цы æрмæджытæй пайда кæнынц, уыдон дæр сты хæрзхъæд.
Августы кæронмæ объект хъуамæ уа цæттæ. Куыстытæ куыд цæуынц, уымæ лæмбынæг кæсынц Арæзтад æмæ архитектурæйы министрад, стæй районы разамынд. Æдæппæтæй Æрæфы районы “Ахуырады райрæзты” федералон программæйы фæлгæты бындуронæй цалцæг кæнынц 4 ахуыргæнæндоны. Цыколайæ уæлдай ма ног кæнынц Æхсæрысæры, Быдыры Дæргъæвсы æмæ Советское хъӕуы скъолатæ. Фæуæрæхдæр уыдзысты сӕ материалон-техникон авналæнтæ дæр. Уый тыххæй рахай кодтой 135 милуан сомы.
