Цыколайы поликлиникæ бындуронæй рацарæзтой. Медицинон æххуыс бакæнынæн дзы ис æппæт нырыккон уавæртæ. Фæлтæрдджын специалисттæ ныридæгæн фыццаг пациенттимӕ кусын райдыдтой. Бæстыхай сцалцæг кодтой «Модернизация первичного звена здравоохранения» федералон проекты фæлгæты.
Фыццаг бон ноггонд поликлиникæйы у бæрæгбон æмæ уыцы-иу рæстæг кусгæ бон дæр. Кабинеттæн сæ фылдæры дохтыртæ пациенттӕн ӕххуыс кӕнын райдыдтой. Консультацитæ æмæ процедурæтæ специалисттæ кæнынц нырыккон уавæрты.
Бындурон рацарæзтмæ поликлиникæ æнхъæлмæ каст 42 азы. Бæстыхайы баивтой æппæт кусæнгарз. Медицинон уагдонæн суткæмæ йæ бон балæггад кæнын у 300 адæймагæн. Кадджын мадзалы уазджытæ арфæ ракодтой объекты кусджытæн.
Поликлиникæйы ис сылгоймæгтæн æмæ сывæллæттæн консультацитæ. Цæржытæн лæггад кæнынц иннæ дохтыртæ дæр. Уымæй уæлдай ног техникæйæ ифтонгдзинад зæрдæхсаинаг нæу.
Æнæниздзинад хъахъхъæнынады райрæзт у ахсджиаг фарста. Уæлдайдæр районты. Æрæфы районы цæры 15 мин адæймаджы. Æртæ азмæ ам байгом 10 ног фелсырон-акушерон пункты æмæ дыууæ амбулаторийы. Уыцы куыст дарддæр дæр кæндзысты.
Æрæфы районы сæйраг рынчындоны бæстыхайæн дæр сарæзтой сæрмагонд экспертизæ. Заууат уавæры кæй у, уымæ гæсгæ йæ рацаразын фæнд кæнынц. Цæттæ кæнынц проектон-хыгъдон гæххæттытæ ног рынчындоны арæзтадæн. Документ цæттæ хъæуамæ уа афæдзы кæронмæ.
