Абон йæ юбилей бæрæг кæны актёр, режиссёр Вячеслав Вершинин. Уæрæсейы адæмон артист, Цæгат Ирыстоны сгуыхт артистыл сæххæст 80 азы. Сценæйы дæснымæ артист суæвыны фæнд сабийæ сæвзæрд.
Вячеслав Вершинин каст фæци Харьковы академион театры цур студи. Дарддæр куыста Смоленскы. 1967-æм азы йæ бинойнагимæ æрцыдысты Орджоникидземæ æмæ ам цæргæйæ баззадысты. Уырыссаг академион театры фыццаг раргом кодта æрыгон ирон интеллигенты фæлгонц спектакль «Перед грозой»-ы. Уыцы куысты тыххæй 1968-æм азы хорзæхгонд æрцыд Хетæгкаты Къостайы номыл паддзахадон премийæ.
Театры Вячеслав Вершинин раргом кодта 200 фæлгонцæй фылдæр. Йæ уарзондæртæ — Михаил Лермонтовы драмæ «Маскарад»-ы кънйаз Звездич, Григорий Горины пьесæ «Мир вашему дому»-йы Тевье, Александр Островскийы уацмыс «Василиса Мелентьева»-йы Иван Грозный. Аивадуарзджытæ сæ алкæцы дæр ирдæй бахъуыды кодтой.
Уымæй уæлдай, Вячеслав Вершинин у курдиатджын режиссёр. Сæвæрдта 37 спектаклы. Сæ фылдæр сты йæ уарзон жанры — комедитæ.
