«Зарынц Уæрæсейы сывæллæттæ».Ахæм сæргондимæ скъолаты хорты фестиваль ацыд Дзæуджыхъæуы. Уый уыд æппæтуæрæсеон фестивалы регионалон къæпхæн. Сарæзтой йæ республикæйы ахуырад æмæ наукæйы министрад, æппæтуæрæсеон музыкалон æхсæнады регионалон хайад æмæ Цæгат Ирыстоны композиторты цæдис. Бацархайдтой дзы 14 хоры къорды Дзæуджыхъæу æмæ районты скъолатæй. Фестивалы уыд æртæ номинацийы – кæстæр, астæуккаг æмæ хистæр зарæггæнджытæ. Æркасты æууæлтæм гæсгæ, сывæллæттæ хъуамæ азарыдаиккой, ирон композиторты ‘хсæн юбиляртæ чи сты, уыдоны фыст уацмыстæ. Кокойты Тæтæрхъан, Плиты Христофор, Людмила Ефимцова æмæ æндæр композиторты музыкалон поэзи фехъусæн уыд æркасты. Уыимæ ма адæмон зарджытæ дæр. Алы номинацийы уæлахиздзауты схорзæхджын кодтой ахуырады министрады дипломтæ æмæ Кады гæххæттытæй. Радтой сын зæрдылдарæн лæвæрттæ дæр.
Мадзалы сæйраг хæс уыд хорты зарджыты традицитæ нæ республикæйы бахъахъхъæнын æмæ парахат кæнын, патриотизмы æнкъарæнтæ æрыгæттæм рæзын кæнын. Жюрийы уæнгты ныхæстæм гæсгæ, сывæллæтты цæттæдзинад уыд бæрзон æмвæзадыл.
