Абон йæ юбилей бæрæг кæны ирон телеуынынады ирддæр стъалы зындгонд диктор Хъулаты Земфирæ. Сæххæст ыл 75 азы. Йæ аив æмæ зæрдæмæдзæугæ хъæлæс ын зонынц æгас республикæйы дæр. Цæгат Ирыстоны адæмон артисткæ 55 азæй фылдæр лæггад кæны адӕмӕн телеуынынады фӕрцы. Кæд æмæ йæ æрыгонæй режиссер суæвын фæндыд, уæддæр ын телеуынынадæй уарзондæр ницы ис. Бирæ азты Хъулаты Земфирæ амыдта информацион программæ «Ирыстон абон». Не ‘сфæлдыстадон къордимæ зæрдиагæй аныхас кодта йæ гуырæнбоны размæ. Бацæттæ кодтам сæрмагонд æрмæг.
Хъулаты Земфира скъола каст куы фæци, уæд йе стырдæр фæнд уыд режиссер суæвын. Италиаг кинематограф бирæ уарзта. Йæхи дæр бафæндыд ахæм кинонывтæ исын. Фæлæ йæ æмбæрста, Мæскуымæ ахуыр кæнынмæ кæй нæ ацæудзæн. Сфæнд кодта йæ уарзон дæсныйадимæ телеуынынады бындурыл зонгæ кæнын. Рæсугъд æрыгон чызг аив æмæ зæллангæнаг хъæлæсимæ хорз сфидыдта уыцы куысты. Дикторы бынаты уайтагъд рафидыдта. Æнæ Хъулаты Земфирæйæ цыма бирæ программæтæ уайгæ дæр нæ ракодтаиккой, афтæ кæсы цæгатирыстойнаг телевизормæкæсджытæм. Зындгонд ирон диктор Дудиаты Владимиримæ фыццаг кусын куыд райдыдта, уый йæ никуы ферох уыдзæн.
Сæ дыууæ дæр сты æгæрон курдиаты хицæуттæ æмæ нæ республикæйы телеуынынады ирддæр стъалытæ. Информацион равдыстытæм-иу алы хæдзары дæр тынг æнхъæлмæ кастысты æмæ сæм-иу кастысты æгас бинонтæй. Дудиаты Владимиры ныхæстæм гæсгæ, ахæм сфæлдыстадон къорды кусын ын уыд тынг æхсызгон æмæ æнцон.
Телеуынынады цы азтæ бакуыста, уыдон зындгонд амонæг нымайы æппæты амондджындæртыл. Хъæздыг уыдысты алыхуызон цымыдисаг цаутæй. Уæлдай уарзондæр та ма йын уымæн сты, æмæ уæд базонгæ ис бирæ хорз адæмимæ, ссардта æцæг хæлæрттæ.
Хъулаты Земфирæ йæхи хорз хъуыды кæны, æрыгонæй, бирæ азты размæ, æркастмæ куы ‘рбацыд æвзонг, хæдæфсарм, фæлæ уæндон чызгæй. Йæ ныхæстæм гæсгæ, телеуынынад йæ царды ахсы ахсджиагдæр бынат. Программæтæм-иу йæхи æнæмæнг цæттæ кодта бæстонæй. Йæ ныхæстæм гæсгæ, телеуынынады куыст æнцон нæу.
Абон дæр Хъулаты Земфирæ йæ куысты æрыгон журналисттæн у зондамонæг. Йæ фæлтæрддзинад не ‘вгъау кæны, куыстыл иузæрдион чи у æмæ тырнындзинад кæмæ ис, уыцы кæстæртæн. Ахуыр сæ кæны аргъ кæнын хистæртæн. Дæнцæгæн хæссинаг сылгоймаг, йæ уæздандзинад, йæ æрдзон рæсугъд удыхъæдæй балхæдта адæмы зæрдæтæ.
