Театралон аивады музейы ацыд «Небесное зеркало» альбомы презентаци. Курдиатджын нывгæнæг, костюмер-сценограф Ходы Виолæйыл ацы аз сæххæст уыдаид 50 азы. Равдысты хиуæттæ æмæ хæлæрттæ радзырдтой сæ мысинæгтæ. Экспозицийы фенæн ис Виолæйы номыл фыст статьятæ дæр. Уæлмонц æмæ арфхъуыдыджын – Виолæ райгуырд æмæ схъомыл сфæлдыстадон бинонты.
Йæ мад хормейстер Кокойты Агуындæ, йæ фыд зындгонд скульптор Ходы Николай. Сæ чызг та зæгъæн ис æмæ сног кодта театралон аивад. Бындур сæвæрдта рагон æгъдæуттæ æвдисæг, хъуыстгонд театр «Арвайдан»-æн. Аивадон къорды архайдæн æмдзæгъд кодтой куыд Уæрæсейы, афтæ фæсарæнты дæр. Театр æвдыста ирон адæмы хæдбындур истори.
Аивадуарзджыты цымыдис кодтой сценикон уæлæдарæсæй. Алы хахх æмæ орнаменты дæр æвæрд уыд арф мидис æмæ хъуыды. Алыхуызон ахорæнтæй пайда кæнгæйæ нывгæнæг адæймаджы хъуыды кæнын кодта царды зилдух хуымæтæджы кæй нæу, ууыл. Виолæ хорзæхгонд уыд Уæрæсейы паддзахадон премийæ æмæ «Сызгъæрин маскæ» театралон премийæ. Йæ фæстæ ныууагъта ирд фæд.
