Сценæйыл — Кæрдзыны культурæйы хæдзары театралон къорд “Бæллиц”. Нана йæ кæстæртæн дзуры, “Арс рувасы куыд куырдта” æмæ “Тæрхъус йæ ныхасæн хицау куыд уыди”, уый тыххæй. Æвзонг артистты фæндыд театрдзауы хъуыдытыл бафтауын, уымæн æмæ алы аргъауæн дæр ис йæхи зондзонæн мидис. Æвзонг артисттæ сæхи мæйæ фылдæр цæттæ кодтой “Амыраны рухсмæ”. Моргуаты Альберт къорды 5 азы архайы.
Аргъæутты дунемæ абалц кодтой Лескены культурæйы хæдзары минæвæрттæ дæр. Сфæлдыстадон къорд “Дети Алании” сæрмагондæй фестивалы архайыны тыххæй сæвзæрд. Ныр 10 азы дæргъы сæ куыст никуы баурæдтой. Разамонæг Бетанты Мальвинæимæ 3 мæймæ бацæттæ кодтой комедион равдыст “Дзыгъуыр карк”. Ирд æмæ цымыдисаг сурæттæй пайдагæнгæйæ, сабитæ равдыстой — алкæимæ дæр хæларæй цæрын хъæуы.
Ацы аз фестивалы архайджыты нымæц минæй ахызт. Кæронбæттæны сæ арæхстдзинад равдыстой 400 æвзонг артисты. Уыдон — муниципалон къæпхæны хуыздæртæ. Се ‘хсæн Хуссар Ирыстоны минæвæрттæ. Номинацитæ: драмон театр, ирон аргъау, эстрадон-сатирикон миниатюрæ, фольклорон театралон равдыст, аивадон эксперимент, аив дзырд.
Архайджытæ сæхи куыд бацæттæ кодтой, уымæн аргъ кодта фæлтæрдджын жюри — театралон аивады дæснытæ, культурæйы сгуыхт кусджытæ. Уæлахиздзаутæн — кады гæххæтытæ æмæ зæрдылдарæн лæвæрттæй. Æппæт равдыстытæ, æнæмæнг, сты мадæлон æвзагыл. Фестивалы сæйраг нысан — рæзгæ фæлтæры ирон æвзаг æмæ литературæмæ æмхиц кæнын, зонгæ сæ кæнын нæ культурæ, ирон фысджыты уацмыстимæ, хъæздыг кæнын сæ миддуне.
Ацы аз фестивалæн юбилейон у. Дæс азы дæргъы сывæллæтты курдиат раргом кæныныл чи архайы, уыдонæн республикæйы Парламенты номæй бацæттæ кодтой кады æмæ бузныджы гæххæттытæ. Мадзалы ма архайдтой культурæйы министр, национ политикӕ ӕмӕ ӕддагон бастдзинӕдты министр, парламенты сæрдар. Мадзаларазджытæ — фæсивæды хъуыддæгты фæдыл комитет æмæ театр “Амыран”.
