Абон æгас дунейы дæр бæрæг кæнынц тарнизимæ тохы бон. Рынчынты сбæрæг кæнын æмæ сæ сдзæбæх кæнын – ахæм хæс сæ размæ æвæрынц Фтизиопульмлнологийы республикон клиникон центры дохтыртæ. Адæймаджы цард æмæ æнæниздзинад бахъахъхъæныны тыххæй хирургтæ æппынæдзух кæнынц уæззау операцитæ.
Хирургтæ лыг кæнынц рæуджыты хъыгдард хай. Операци æртæ сахаты фæстæ фæуыдзæн. Пациенты реанимацимæ баивдзысты. Дарддæр – реабилитаци. Ныр æндæр фæстиуджытæм нал асайдзæн тарниз. Бирæтæ йæ æнæдзæбæхгæнгæ низыл нымайынц, фæлæ афтæ нæу. Уый æнæфæцудгæйæ æвдисынц фтизиопульмонологийы республикон клиникон центры.
Тарнизæй рынчынты дунеон рейтингы Уæрæсе ис астæуæй. Фæлæ рæуджыты низ хостæй алы хатт не сдзæбæх вæййы. Арæх бахъæуы хирургон æххуыс. Ам, центры, уæззау операцитæ арæх скæнынц. Иуæй-иутæ сæ фæцæуынц фарастгай сахæтты онг. Уæдæ рынчынтæй дæр кæцыдæртæ реанимацийы бафæстиат вæййынц дыууæ къуырийы онг. Алы уавæр дæр æвзæрст цæуы хицæнæй. Æнтыстджын архайдæн æппæт ифтонггæрзтæ æмæ хостæ ис, зæгъынц дохтыртæ.
Низ рагагъоммæ рабæрæг кæнæн ис диспансеризаци æмæ профилактикон æркасты руаджы. Адæймаг хъуамæ афæдз иу хатт ацæуа флюорографи. Сæ рæуджыты уавæр сбæрæг кæныны фадат ис дæрддзæф хъæуты цæрджытæн дæр. Уырдæм арвитынц бынативгæ медицинон комплекстæ.