Абон фæссихор ныккалдта тыхджын къæвда ихимæ. Æнæнхъæлæджы цауты фæдыл къамисы сæрмагонд æмбырды куыд фехъусын кодтой афтæмæй Горæтгæрон районы æнæ электрон тыхæй баззадысты Джызæлы æмæ Архонкæйы кæцыдæр уынгтæ, уыимæ Дæллаг Саниба æнæхъæнæй. Ираныхъæуы та донцъирæны æрцыд авари. Специалисттæ æвæстиатæй кусын райдыдтой фарстатæ аиуварс кæныныл. Уый тыххæй хъусын кæнынц оперативон штабы æмбырды. Дзæуджыхъæуы цалдæр уынджы æнæ электрон тыхæй баззадысты. Горæты уынгтæ та доны бын фесты. Тыхдымгæ бæлæстæ æд уидæгтæ стыдта.
Специалисттæ кусынц фæстиуджытæ аиуварс кæныныл. Æнæнхъæлæджы цауты министрады куыд зæгъынц, афтæмæй ахæм боныхъæд ахæсдзæн цалдæр боны. Тæссаг у тыхджын дымгæ, тæрккъæвдатæ æмæ ихуардæй. Цæугæдæтты та тæссаг у донивылдтытæй. Хæхты ранæй-рæтты рацæудзысты ламидæттæ. Боныхъæды аххосæй сæхгæдтой «Дзæуджыхъæу-Цыкола-Лескен» фæндаджы уадздзаг. Паддзахадон автоинспекци сиды шофыртæм, цæмæй къæрцхъусдæр уой.
