Уæлахизы бонмæ баззад цалдæр боны. Куыд æппæт бæстæйы, афтæ Цæгат Ирыстоны дæр цæуынц цæттæ кæнæн мадзæлттæ. Зилынц æмæ æфснайынц Сырх æфсады цыртдзæвæнтæ æмæ мемориалтæ. Аивгæнæн куыстытæ цæуынц акци #МЫВМЕСТЕ-йы фæлгæты. Расидтысты йæ Адæмон фронты уæнгтæ. Мадзал сси æрвылазон. Ацы хатт бархионтæм æххуысмæ рацыдысты Донбассæй ссæуæг адæм.
Наталья Самойловайæн æнæзонгæ нæу сæрибардзинад Советон адæмы къухы куыд зынтæй бафтыд, уый. Йæ фыд Фыдыбæстæйы Стыр хæсты архайгæйæ знаджы саста Костромайæ Чехословакийы онг. Хæсты цаутæ нæ уарзта дзурын, йæ мысинæгтæ йæ ногæй æппæрстой уыцы дывыдон арты. Сылгоймаджы ныхæстæм гæсгæ, сæ бинонтæн Уæлахизы бон кæддæриддæр уыд уæлдай аргъ кæмæн кæнынц, ахæм бæрæгбон. Цалдæр мæйы размæ сæ бахъуыд Ясиноватая горæты сæ хæдзар æнæбары ныууадзын. Сылгоймаг куыд зæгъы, афтæмæй кæм фæнды уæвгæйæ дæр ахсджиаг у хæстон хъæбатырты зæрдыл дарын. Уый тыххæй йæ бафæндыд Адæмон фронты акцийы бацархайын.
Сабырдзинады сæраппонд йæ цард чи нæ бавгъау кодта, уыцы советон æфсæддонты хъæбатырдзинад зæрдыл дарыныл ахуыр кæнынц рæзгæ фæлтæры дæр. Фæсивæдимæ ахæм хуызы кусын ахсджиаг у. Сывæллæттæ сæхæдæг куыд зæгъынц, афтæмæй сæ райгуырæн зæххыл 9-æм майы бæрæгбонмæ зæрдиагæй цæттæ кодтой.
Ныртæккæ уазджытæ цæрынц Тæмисчъы санаторийы. Ам семæ кæнынц хъомыладон куыст, уæлдай æргом здахынц патриотизмы æнкъарæнтæ сывæлæтты зæрдæты гуырын кæнынмæ.
Уæлахизы боны агъоммæ æфснайæн зиу расидыны хъуыды сæвзæрд Адæмон фронты минæвæрттæм. Акци сси æрвылазон. Ацы хатт базылдысты Алагиры районы мемориалтæм.
Акци дардддæр дæр æххæст кæндзысты. 9-æм маймæ республикæйы районты цыртдзæвæнтæ саив кæндзысты. Мадзалы сæйраг хъуыды-сæрибардзинады тыххæй йæ цард чи радта, уыдоны рухс нæмттæ æрмæст мемориалтыл ма баззайой, фæлæ ма адæмы зæрдæты дæр.
