Йæ дæсныйадыл æнувыд адæймаг Хъуппеты Риммæ къорд азы кусы æфхæрдтæ æххæстгæнæн федералон управленийы. Уый хыгъд æм ис сау рон каратэйæ. Йæ бæрнон архайды фæрцы йæхиуыл къæм абадын нæ уадзы. Службæ æмæ спорт йæ царды ахсынц стыр бынат.
Хъуппеты Риммæ сывæллонйæ йæхи фæлвæрдта спорты алы хуызты. Цыди гимнастикæмæ, ленк кæнынмæ æмæ кафджытæм. Йæ зæрдæмæ дзы иу дæр нæ айста, цалынмæ каратэйæ тренировкæмæ нæ бахауд, уæдмæ. Скæсæйнаг хъæбысхæцтыл чызг æнувыд у ныр 20 азы. Йæхи равдыста алыхуызон ерысты æмæ чемпионатты. Бирæ хатты уыд призер. Уыцы-иу рæстæг райдыдта тренеры куыст кæнын дæр. Фæзынд æм сау рон райсыны бæллиц дæр.
Æмæ йæ кæд ныр ис бинонтæ спортмæ уыййас нал æвдæлы, уæддæр æнæ тренировкæтæй йæ бон нæу. Риммæ æнæ спортæй йæ цард нæ уыны. Ныртæккæ æмхиц у кросс-фитыл. Зæгъы – буары æнæниздзинад æххуыс у уды фидардзинадæн.
Ахæм бæрнон архайды фæрцы Риммæ йæ куысты кæны æнтыстджын къахдзæфтæ 12 азы дæргъы. Райдыдта бухгалтерæй, абон та у организацион куысты управленийы разамонæджы æххуысгæнæг. Æфхæрдтæ æххæстгæнæн федералон службæйы кусын уыд йæ сæйраг нысан. Йæ дæсныйады ахсджиаг у бæрнон æмæ рæстуд уæвын, уыимæ дисциплинæ. Риммæйы ныхæстæм гæсгæ æппынæдзух хъæуы хиуыл кусын. Уыцы миниуджытæй хайджын куы уай, уæд æнтыстджын дæр уыдзынæ.
