Цымыдисаг хъуыды, бизнес-план æмæ паддзахадон программæйы архайынмæ курдиат бадæттын. Уыдоны руаджы амалхъом адæм рамбылдтой гранттæ. Куыст дæттыны комитет сæххæст кодта «Уæлæмхасæн мадзæлтты»-ы федералон программæйы домæнтæ. Проект адæмæн радта ног куысты бынæттæ.
Лазерон хирургийы клиникæйы ног кусæнгарз фæзынд мæй размæ. Уый фæрцы лæггæдты хæрзхъæддзинад фæхуыздæр. 200 мин сомы грант дзæбæхгæнæндон райста адæмæн куыст дæттыны комитетæй. Фæлæ эндоскоп аслам нæу. Йæ балхæнынæн гранты фæрæзтæ не сфаг сты, фæлæ уæддæр рынчындоны уаргъ субсиди фæрогдæр кодта.
Паддзахадон æххуыс цæмæй райсай уый тыххæй хъæуы куысты бынæттæ саразын. Клиникæйы отоларингологы кабинет куы фæзынд, уæд дзы дæсны специалисттæ дæр бахъуыд.
Гранттæ баххуыс кодтой бирæ амалхъом адæмæн. Зæгъæм офтальмологон клиникæйы фæзынд ног хирургон кусæнгарз. Ныр дзы цæстыты низ тагъддæр рабæрæг кæнынц, уымæй уæлдай ма кæнынц хъæугæ операцитæ дæр.
Конкурсы архайыны фадат уыд алы амалхъом адæймагæн дæр. Æрмæстдæр хъуыд цымыдисаг проект бацæттæ кæнын æмæ къамисмæ курдиат бадæттын. 200 мин сомы бæрц субсидитæ ацы аз райстой 103 амалхъом адæймаджы. Уый фæрцы ног куысты бынæтты ныллæууыдысты 206 адæймаджы. Гранттæ райсынмæ æдæппæтæй курдиæттæ балæвæрдтой 200 амалхъом адæймагæй фылдæр. Хуыздæрты равзæрста сæрмагонд къамис.
«Абоны бонмæ 90 адæймаджы цы куыст бакодтой, æхцайы фæрæзтæй куыд спайда кодтой уый сбæрæг кодтам. Программæйы фæрцы сарæзтам ног куысты бынæттæ. Гранттæ райстой куыд амалхъом, афтæ хицæн адæм дæр», — РЦИ-Аланийы куыстдæттыны комитеты сæрдар Платы Альбинæ.
Гранты æххуыс райстой бизнесы алы къабæзтæ: туризм, хъæууон хæдзарад, аджинæгтæ æмæ дзулфыцæн куыстуæттæ æмæ афтæ дарддæр. Адæмæн куыст дæттыны комитеты зæрдæ дарынц, федералон æххуысы программæйæ иннæ аз дæр спайда кæнæн кæй уыдзæн, ууыл.
Брытъиаты Феликс
