Фыццаг æмæ легендарон, йæ уæлахизтæ дисы ‘фтыдтой æппæт дунейы. Андиаты Сослан йе ‘сгуыхтдзинæдтæ профессионалон спорты ныфысста сызгъæрин дамгътæй. Олимпаг хъæзтыты фыццаг ирыстойнаг уæлахиздзау сси æнæхъæн дуджы егъау æмæ ирд спортивон стъалы. Абон Андиаты Сосланыл хъуамæ сæххæст уыдаид 70 азы. Уæрæсе æмæ чысыл Ирыстон сæрыстыр кæмæй у, уыцы богалы тыххæй нæ дарддæры æрмæг.
Дуджы символ æмæ цалдæр фæлтæры кумир. Йæхицæй хуыздæр æмæ уæздандæр адæймагæн скæнæн нæ уыд. Фæсивæдæн уыд фæзминаг. Равдыста сын, Олимпаг фæндагыл алцыдæр сæхицæй аразгæ кæй у, уый.
Олимпаг хъæзтыты 2 хатты чемпион райгуырд 1952 азы 21 апрелы Дзæуджыхъæуы. Сослан бинонты `хсæн уыд се `ппæты кæстæр. Йе `мбæлттæ æмæ йæ хæстæджытæ куыд дзурынц, афтæмæй йæ сабибонтæй фæстæмæ уыд хъæддых æмæ йын богал æнæсуæвгæ нæ уыд. Йæ фыд Петр йæхи фæлвæрдта уæззæуттæ исыны спортæй. Йæ хистæр æфсымæртæ та Геннадий æмæ Сергей уыдысты хъæбысхæцджытæ. Цалдæр хатты систы Уæрæсейы уæлахиздзаутæ. Сосланыл 12 азы куы цыд, уæд æй йæ хистæр æфсымæртæ æрбакодтой залмæ, уæгъдибар хъæбысхæсты скъолайы бындурæвæрæг Дзгойты Аслæнбегмæ.
5 азы фæстæ æрыгон спортсмен Америкæйы сси дунеон чемпион. Йæ хистæр æфсымæр Сосланы спортивон фæндагæн стыр ахъаз фæцис. Пъедестал Андиаты Сослан æмæ йе `фсымæртæ сæхи бакодтой. Уыцы ерысты рамбылдтой æппæт майдантæ дæр. Ахæм æнтыст уæдæй фæстæмæ никæй къухы бафтыд.
Гауызыл йæ арæхстдзинад дисы æфтыдта. Йæхицæй уæззаудæр ныхмæлæуджытыл дæр-иу фæуæлахиз. Цырд, хъæбатыр æмæ æрхъуыдыджын. Спорты дæсныйæн гауызыл æмбал нæ уыд. Кæимæ хæцыд, уыдон æй æмбæрстой, фæлæ йын царды та æмбал нæ уыд хæлардзинады миниуджытæй.
Спорты иу мисхал дæр никæмæн лæвæрдта, царды та уыд фæлмæнзæрдæ адæймаг. Йæ мидбылхудт ын абон дæр ма мысынц. Йæ зæрдæ рыст, кæй нæ зыдта, уыдоныл дæр. Уæздан, раст цыма йе `нтыстдзинæдтæй æфсæрмы кодта, афтæ. Уæвгæйӕ, йе сгуыхтдзинæдтæ, йæ намыс уыдысты æгæрон.
Гауызæй куы `рхызт, уæддæр Андиаты Сослан куыста спорты къабазы, стыр æвæрæнтæ йæм хæсгæйæ. Уыд Советон Цæдисы уæгъдибар хъæбысхæстæй иугонд командæйы разамонæг, футболон командæ «Алани»-йы президент. Сарæзта цалдæр спортивон скъолайы. Æнæфæцудгæ кад ын кæй уыдис, уый тыххæй йын Цæгат Ирыстоны æрвылаз аразынц йæ номыл конд ерыстæ. Паддзахадон службæйы уыд Уæрæсейы Олимпаг комитеты вице-президент, 18 азы республикæйы физкультурæ æмæ спорты комитеты сæрдар, уыимæ республикæйы парламенты депутат. Йе ‘мкусджыты ныхæстæм гæсгæ, хъуыддаг æрдæгыл никуы уагъта, архайдта фарстайыл кæронмæ бакусыныл.
Андиаты Сослан каст фæци хæххон-аграрон университеты экономикон факультет. Бирæ азты фæстæ та ногæй бакъахдзæф кодта ахуыргæнæндоны къæсæрæй куыд физкультурон хъомылад æмæ спорты кафедрæйы разамонæг. Йæ студенттæн-иу афтæ дзырдта: «чемпион суæвынæн адæймаг хъуамæ бирæ фæллой кæна, йæхиуыл æвæллайгæйæ куса, цæмæй йæ хуыздæр миниуджытæ ма фесафа».
Уæлдæр ахуыргæнæндоны æмæ хъæбысхæсты академийы ныфс бауагъта бирæ æвзонг спортсменты. Се ‘хсæн чемпионтæ дæр. Ныхасæй дæр никуы никæй бафхæрдта. Хионау-иу афарста канд спортивон æнтыстдзинæдтæй нæ, фæлæ ма царды æндæр фæзилæнтæй. Фæсивæдæн абон дæр у дæнцæгæн хæссинаг.
Æхсæнадон кусæг, йæ удуæлдай фæллойы тыххæй йын саккаг кодтой бирæ паддзахадон хæрзиуджытæ. Йæ зæрдæйы æгæрон уарзт уыд спортмæ, куыстмæ, адæммæ æмæ бинонтæм. Æмбаргæ фыд, куырыхон хистæр æмæ æцæг хæлар. Спорты историйы йæ ном сызгъæрин дамгъæтæй фыст æрцыд.
