Мурасты Зæринæ ахуырты размæ сывæллæтимæ бæстонæй æрныхас кæны. Уый фæстæ та сын райдайы кафты техникæ æвдисын. Алы сывæллонмæ дæр хицæнæй бацæуы амонынмӕ. Ахуыр сæ кæны пластикæйыл, сценæйыл хи куыд дарын хъæуы, ууыл. Аивады алцæмæн дæр йæхи бынат ис. Хъуамæ æххæстгонд æрцæуой иууыл хорз.
Фæсивæд хæдзармæ кæд нырма хæрз æрæджы сыздæхтысты, уæддæр сæ уарзон сценæ йæхимæ ‘лвасы. Кæд та ацы хатт дӕр уæлахиздзаутæ систы, уæддæр сӕ фыццаг ахуырты – рæдыдтытыл куыст. Чи зоны, æмæ ацы лыстæг къуылымпыдзинæдтæ аивадуарзджытæ æмбаргæ дæр нæ бакодтой, фæлæ Мурасты Зæринæ у домаг.
Ансамбль хуыздæр сси кадджын фестиваль «Роза ветров»-ы. Ацыд Мæскуыйы. Нæ коллектив хуыздæр разынд æртæ номыры. «Хохаг» æмæ «Абхазаг» кафты, уыимæ ирон кæфтытæм гæсгæ сæрмагонд равдысты. Ахæм поппури сæвæрдта ансамблы разамонæг Мурасты Зæринæ. 10 минуты æнæрлæугæ кафт. Рог æмæ аив кафт ивтой зын æмæ æнахуыр трюктимæ фӕзилӕнтӕй.
Мурасты Зæринæйы ныхæстæм гæсгæ, фонограммæимæ ансамбль нæ кусы, æрмæст фæндырдзагъдимæ, артисты ноджы чи разæнгард кæны, ахæм музыкæимӕ. Уыцы хъуыддагæн дæр аргъ скодтой. Уæвгæ, дисы æфтауы, конкурсы архайджыты нымæц дæр. Бæстæйы 45 субъектæй 9 мин адæймагæй фылдæр. Сæ арæхстдзинад æвдыстой суанг æндæр бæстæтæй сфæлдыстадон къордтæ дæр. Казахстан, Азербайджан, Белорусси, Германи, Турк. Ныхмæлæуд рауад цымыдисаг.
Сывæллæтты цæттæдзинадæн аргъ кодтой сæрмагонд къамисы уæнгтæ. Се ‘хсæн ВКИК æмæ ГИТИС-ы педагогтæ, культурæйы институты минæвæрттæ. Фестиваль ма сси равдыст-форум «Россия»-йы хай дæр. «Арфан»-ы артисттæ балхæдтой адæмы зæрдæтæ.
Ансамбль «Арфан» раивта къорд фæлтæртæ, фæлæ сæ курдиат æмæ тырнындзинады руаджы сæ равдыстытæ кæддæриддæр сты, дисы чи æфтауы, ахæмтæ.
Калоты Дзерассæ
