Боныхъæды аххосæй æхгæд æрцыдис Арвкомы фæндаг. Рады æнхъæлмæ кæсынц уæзласæн хæдтулгæтæ. Уавæры тыххæй бæлвырддæр нæ дарддæры æрмæджы.
Арвыкомы фæндагыл уæзласæн хæдтулгæты цыд æрурæдтой райсомы 9 сахаты æмæ 40минутыл. Цыбыр рæстæгмæ дзы сæмбырд сæдæ машинæйы бæрц. Рад адаргъ 5 км онг. Иуылдæр æнхъæлмæ кæсынц. Фируз Вурезашвили йæ балц кæны Гуырдзыстонмæ. У фæлтæрдджын шофыр. 15 азæй фылдæр хойрæгтæ ласы алы бынæттæм. Рады ныр лæууы æртæ боны. Катайы бацыд. Йæ товарæн фесæфынæй тæрсы. Фыццаг къуылымпыдзинæдтæ баййæфта гæххæттыты тыххæй. Ныр та сæ размæ нæ уадзы боныхъæд.
Уæвгæ рæстæг куыд цæуы, афтæ бирæ кæнынц хæдтулгæтæ дæр. Цæмæй шофыртæ бынтон сæ уавæрæй ма стыхсой, уый тыххæй сын арæнмæ хæстæг аразынц æнцонвадат уавæртæ.
Хæстæгдæр рæстæг ам скусдзæн хъармгæнæн пункт. Уыдзæн дзы хи схъарм кæнӕн, хæрздæф цыминаг бануазӕн, телефон сифтындзӕн. Ам хæстæг ма уыдзæн æппæт æмбæлгæ инфраструктурæ дæр: хæрæндæттæ, фысымуæттæ. Зæгъын хъæуы уый дæр, æмæ хæстæгдæр рæстæг боныхъæд хорзырдæм нæ раивдзæн. Цæгат Ирыстоны уардзæн мит, батдзæн мигъ, фæндæгтæ уыдзысты бырынцъаг.
Уæдмæ та уал шофыртæ æнхъæлмæ кæсдзысты, боныхъæд кæд фæхуыздæр уыдзæн, æмæ сæ бон арæны сæрты ахизын кæд бауыдзæн.
