Æмæ кæд Адæмон фронты уæнгтæ скъолайы хæрианджы хæрзхъæддзинад бæрæг кæнынц, уæд хойраджы комбинаты бавдæлдысты æмæ скъоладзаутæн сарæзтой æркаст. Фæсивæд сæхи фæлвæрдтой хæринаггæнæджы дæсныйады. Цæттæ кодтой ахуыргæнæндоны менюйы хæринæгтæ.
Пиццæ ирон цыхт æмæ карчы фыдимæ. Сывæллæттæ фыццаг хъуамæ ацы хæрианг сцæттæ кодтаиккой. Хойрæгтæ æмæ хъацæнтæ сты æмхуызон, фæлæ куысты хатдзæг се ‘ппæтæн дæр у алыхуызон. Уымæн, æмæ ам ахсджиаг у алы лыстæгдзинад дæр. Адыл ахады хыссæ куыд атæнæг кодтой, æмæ йыл суанг хойрæгтæ куыд скарстой, уый дæр.
Уæдæ “Фишбол”-тæ кæй хонынц, уыдон дæр рауадысты. Сты карчы дзидза æмæ насæй конд. Сывæллæттæ хорз зонынц ацы хæринаг. Уымæн æмæ у скъолайы менюйæ, куыд пиццæ афтæ. Иннæ къæпхæн куадзæны адджинæгтæ саив кæнын, æйчытæ сахорын. Сабитæн æххуыс кодтой æмæ сын амыдтой хойраджы комбинаты специалисттæ. Алчидæр архайдта йæ къордæн баллтæ райсыныл.
Хæринагæн аргъ кодтой цалдæр бæрæггæнæнмæ гæсгæ. Сæйрагдæр æддаг бакаст æмæ, кæй зæгъын æй хъæуы, ад. Жюрийы хыгъды хойраджы комбинаты специалисттæ, хæринаггæнджытæ, ахуыргæнджытæ æмæ ныййарджытæ.
Гастрономон ныхмæлæуд скъоладзауты ‘хсæн бацæттæ кодтой фыццаг хатт Дзæуджыхъæуы хойраджы комбинат æмæ бынæттон администраци. Специалистты ныхæстæм гæсгæ, сæйраг нысан – сывæллæтты æргом раздахын пайда хæринаг æмæ æнæниз царды уагмæ. Уымæ гæсгæ ма скъоладзаутæм ма æнхъæлмæ каст тематикон викторинæ дæр.
Ныхмæлæуды фæуæлахиз хæлардзинад. Сывæллæттæ райстой лæвæрттæ, сæйрагдæр та æхсызгон æнкъарæнтæ. Комбинаты кусджытæ дарддæр фæнд кæнынц ахæм мадзæлттæ аразын горæты скъолаты.
