Дзæуджыхъæуы ацæргæ адæмæн æмæ инвалидтæн аразынц хæдзар-интернат

Дзæуджыхъæуы национ проект “Бинонтæ”-йы фæлгæты аразынц ацæргæ æмæ се ‘нæниздзинад хъыгдард кæмæн у, уыцы адæмæн хæдзар-интернат. Уый тыххæй фехъусын кодта Сергей Меняйло. Сæргълæууæджы ныхæстæм гæсгæ, нырыккон социалон кусæндоны уыдзæн 200 бынаты. Ныртæккæ цæуынц арæзтадон куыстытæ, амайынц къултæ. Дыууæуæладзыгон бæстыхай æрбынат кæндзæн курортон зонæйы, Доны станцæйы фарсмæ. Уыдзæн дзы æнцонвадат иубынатон, дыууæбынатон æмæ æртæбынатон агъуыстытæ. Бæстыхайы фæзуатыл ма скæндзысты тезгъогæнæн фæндæгтæ æмæ фæлладуадзæн фæзтæ, чысыл дукани æмæ егъау оранжерей. Алы уæладзыджы дæр фæзындзæн дидинæгдон, чиныгдон, компьютерон кълас, кинозал, спортивон æмæ тренажертимæ залтæ. Уыимæ ма дзы уыдзæн хæрæндон, медицинон кабинеттæ, сенсорон агъуыст, уæлæдарæсмæ базилæн кæм ис, ахæм бынæттæ.