Цæгат Ирыстоны бюджет хæстæгдæр æртæ азмæ фидаргонд æрцыд. Ахсджиагдæр пункттыл депутаттæ æрдзырдтой парламенты кæронбæттæн æмбырды.
Раздæрау, ныр дæр сæйраг финансон документы фылдæр æргом аздæхтой социалон фарстатæм. Нымад дзы æрцыдысты, федералон центр регионæн цы уæлæмхасæн фæрæзтæ рахай кодта, уыимæ хъалонимӕ æмæ æнæхъалон æфтиæгтæ. Иннæ азы æфтиæгтæ эксперттæм гӕсгӕ хъуамӕ уой 46 млрд æмæ 817 млн сомы, хæрдзтæ та – 47 млрдæй чысыл фылдæр.
Абон ма Доййаты Светланæйы «Справедливая Россия-Патриоты-За правду» фракцийы минæвæрттæ равзæрстой парламенты сæрдары хæдивæгæй. Йæ кандидатурæйыл схъæлæс кодтой 53 депутаты. Уæ зæрдыл æрлæууын кæндзыстæм, раздæр уыцы бынатæй йæхи суæгъд кодта вице-спикер Фадзайты Арсен.
